АҚШ «Керимов яхтаси»ни кимошди савдосига қўйди

Россиялик олигархга тегишли экани айтилаётган кема Россия-Украина уруши бошлангач олиб қўйилган эди. Унинг эксплуатацияси учун ойига қарийб бир миллион доллар сарфланади.

Фото: amadeaauction.com

АҚШ ҳукумати россиялик сенатор ва тадбиркор Сулейман Керимовга тегишли экани тахмин қилинаётган «Амадея» суперяхтасини ёпиқ аукционга қўйди. Савдолар 2025 йил 10 сентябрга белгиланган, дейилади аукцион сайтида.

Яхта эгасидан олиб қўйилгач, 325 миллион долларга баҳоланган. Тахминларга кўра, аукцион ғолиби уни камроқ суммага сотиб олиши мумкин, деб ёзди NBC News. Савдода иштирок этиш учун талабгорлар 10 миллион доллар миқдорида гаров пули тўлаши керак.

АҚШ Россия қўшинларининг Украинага кенг кўламли бостириб кириши муносабати билан мусодара қилинган яхтани биринчи марта сотмоқда, деб ёзди Megayacht News. АҚШ 2022 йил май ойида, Россия-Украина уруши бошланганидан кўп ўтмай, Фижи оролларида ушбу 106 метрлик кемани мусодара қилганди.

ФҚБ кемани Керимовнинг оиласи билан боғламоқда. АҚШ ҳукумати техник хизмат кўрсатишнинг қимматлиги ва экипаж учун «ортиқча харажатлар» туфайли яхтани сотишга қарор қилгани таъкидланмоқда. Ойлик харажатлар 922 минг долларга баҳоланган. 2024 йил декабрига келиб, яъни олиб қўйилгандан икки ярим йил ўтгач, АҚШ ҳукумати яхтага хизмат кўрсатиш учун умумий ҳисобда 30 миллион доллар сарфлаган.

Аукцион сайтидаги материаллардан маълум бўлишича, кемада саккизта каюта бўлиб, 16 нафар меҳмон ва 36 нафар экипаж аъзоси жойлашиши мумкин. Яхтада вертолёт майдончаси, бассейн, гўзаллик салони, тренажёр зали, иккита спа-салон, иккита лифт ва бир нечта бар мавжуд.

Россия қўшинларининг Украинага бостириб кириши туфайли россиялик олигархдан олиб қўйилган яхтани сотиш бўйича биринчи кимошди савдоси Европада 2022 йил август ойида бўлиб ўтган эди. Шу вақтда Дмитрий Пумпянскийнинг «Аксиома» яхтаси 37,5 миллион долларга сотилган - бу 75 миллион долларлик ҳақиқий тахминий қийматдан икки баравар кам.

«Амадея» суперяхтаси, россиялик тадбиркорларнинг бошқа тахминий активлари сингари, Россиянинг Украинага қарши уруши бошланганидан кейин ташкил этилган АҚШ Молия вазирлигининг KleptoCapture номли ишчи гуруҳи томонидан блокланган. Гуруҳ Россияга қарши санкцияларга риоя этилишини кузатиб борган ва Кремлга алоқадор тадбиркорларга тегишли деб тахмин қилинган активларни блоклаган. 2025 йилда Доналд Трампнинг иккинчи президентлик муддати бошланганидан сўнг, АҚШ ҳукумати KleptoCapture ишчи гуруҳини тарқатиб юборди.

#АҚШ #Россия #Сулейман Керимов