Песков: Россиянинг ташқи сиёсатига баҳо бериш учун Путинга қулоқ солиш керак

Россия ташқи сиёсатига баҳо бериш учун Путиннинг баёнотларига қараш керак, деди Песков Кремл Медведевга оҳангини пасайтиришни маслаҳат берадими, деган саволга жавоб қайтариб.

Фото: kremlin.ru

Россиянинг ташқи сиёсатига баҳо бериш учун президент Владимир Путиннинг баёнотларига қараш керак. Бу ҳақда Россия президенти матбуот котиби Дмитрий Песков маълум қилди.

«Асосийси, албатта, президент Путиннинг позицияси. Мамлакатимизда ташқи сиёсатни давлат раҳбари — президент Путин шакллантиради», — дея унинг сўзларини келтиради "Интерфакс" агентлиги.

Шу тариқа Песков Кремл собиқ президент Дмитрий Медведевга ташқи сиёсат бўйича баёнотларини юмшатишни маслаҳат берадими, деган саволга жавоб берди.

«Россия ядро қуролини тарқатмаслик мавзусига жуда эътиборли ва биз ҳар бир инсон ядровий риторикадан жуда эҳтиёт бўлиши керак, деб ҳисоблаймиз», — дея қўшимча қилди Кремл вакили.

Медведев билан сиртдан можарога киришган АҚШ президенти Доналд Трамп «тегишли ҳудудга» жойлаштиришни буюрган иккита ядро сувости кемасини кўчириши ҳақида гапирар экан Путин матбуот котиби шундай таъкидлади: «Америка сувости кемалари аллақачон жанговар навбатчиликда, бу давом этаётган жараён». «Биз ҳозир гап қандайдир эскалация ҳақида кетяпти деб ўйламаймиз», — дея қўшимча қилди Песков.

#Владимир Путин #ташқи сиёсат #Россия #Дмитрий Песков