Қўшимча функционаллар
-
Тунги кўриниш
Трамп Путин билан «ҳудудлар алмашинувини» муҳокама қилмоқчи – ОАВ
Гап нима ҳақида кетаётгани маълум эмас.
Фото: AP
АҚШ президенти Доналд Трамп иттифоқчиларига Россия президенти Владимир Путин билан учрашувда Украинада ўт очишни тўхтатиш масаласини муҳокама қилмоқчи эканини айтди, деб хабар берди Bloomberg манбаларга таяниб.
Уларнинг сўзларига кўра, Трамп 6 август куни Европа давлатлари ва Украина етакчилари билан суҳбат чоғида бу борада «оптимистик кайфиятда» бўлган.
АҚШ президенти, шунингдек, агар томонлар «ҳудудларни алмашиш масаласини» муҳокама қилса, Путин тинчлик музокараларига киришишга тайёр бўлишини тахмин қилди, деди манбалар. Улар гап нима ҳақида кетаётганига аниқлик киритмади.
Россия ва АҚШ президентлари тез орада учрашмоқчи. Бундай келишувга Владимир Путин ва АҚШ президентининг махсус вакили Стивен Уиткоффнинг 6 август куни Москвада бўлиб ўтган учрашувида эришилган.
Ғарб матбуотига кўра, Трамп Путин билан учрашувдан кейин Россия ва Украина етакчилари билан уч томонлама музокаралар ўтказишни режалаштирмоқда. Кремл бу таклифга изоҳ бермади, деди 7 август куни Россия президенти ёрдамчиси Юрий Ушаков.
Россия 2022 йилда аннексия қилинган Украинанинг Донецк, Луганск, Херсон ва Запорожие вилоятларини тўлиқ назорати остида қолдиришни талаб қилмоқда. Шу билан бирга, уч йилдан ортиқ уруш давомида Россия армияси ушбу ҳудудларнинг бирортасини тўлиқ эгаллаб ололмади. Бундан ташқари, Россия Суми ва Харков вилоятларининг кичик ҳудудларини назорат қилмоқда.
