Tramp yana bir bor Soipovni o‘limga hukm qilishga chaqirdi

AQSh prezidenti Donald Tramp Nyu-Yorkda terakt sodir etgan Sayfullo Soipovga o‘lim hukmi chiqarishga chaqirdi.

«Men Nyu-Yorkdagi terrorchini Guantanamoga (harbiy qamoqxona - tahr.) yuborishni istardim. Ammo bu jarayon ko‘p vaqtni oladi... Tez harakat qilish kerak. O‘lim jazosi!», deya yozgan Tramp tvitterida.

Tramp bundan avvalroq ham terrorchini Guantanamoga, AQSh hukumati terrorizmda ayblanuvchi xorijliklarni sudsiz tutib turadigan qamoqxonaga yo‘llamoqchiligini ma'lum qilgandi. Keyinroq u Soipov faqat qatl etilishi kerakligi haqida ayta boshladi.

Seshanba kuni Nyu-York g‘arbidagi Manhettenda o‘zbekistonlik Sayfullo Soipov boshqaruvidagi pikap velosipedchilar ustiga yurdi. U odamlarni bosib o‘tib, maktab avtobusiga borib urilgan. Haydovchi voqea joyidan qochib ketishga uringanida politsiyachilar tomonidan ushlangan.

Uning hujumi oqibatida 8 kishi halok bo‘lib, 12 kishi jarohatlandi. Qurbonlarning besh nafari argentinaliklar, bir nafari belgiyalik va ikki nafari amerikalik edi.

Soipov dastlabki sud eshituvida qilmishidan afsuslanmasligini aytdi. Terakt sodir etish va terrorizmda ayblangan shaxsda AQShda o‘lim jazosi belgilangan.