Shaxsiy himoya vositalari sifati va ularni ishlab chiqarish hajmi yanada oshiriladi

18 mart kuni Farmatsevtika tarmog‘ini rivojlantirish agentligida tibbiy buyumlar va gigiyenik vositalar ishlab chiqaruvchi korxonalar rahbarlari, tekstil sanoati vakillari va distribyutorlar bilan kengaytirilgan yig‘ilish bo‘lib o‘tdi.

Majlisda Farmatsevtika tarmog‘ini rivojlantirish agentligi direktori Sardor Kariyev koronavirus pandemiyasining tarqalishi bilan bog‘liq vaziyat borasida so‘z yuritib, kasallikka qarshi kurash bo‘yicha ko‘rilayotgan chora-tadbirlarni yanada kuchaytirish zarurligini aytib o‘tdi. Bunda himoya niqoblarini ishlab chiqarayotgan korxonalar hajmni ko‘paytirishi uchun ishlab chiqarishni yanada kuchaytirish bilan birga ularning sifatiga e'tibor qaratishlari zarurligi ta'kidlandi. Aholining himoya niqoblariga bo‘lgan ehtiyojini qondirish maqsadida yig‘ilishda ishtirok etgan tibbiy buyumlar ishlab chiqaruvchi korxonalar rahbarlari, tekstil sanoati vakillari va distribyutorlar o‘zaro hamkorlikda ish olib borishga kelishib oldilar.

O‘zbekistonda tibbiy buyumlar, aynan tibbiyot va gigiyenik yuz niqoblarini ishlab chiqaruvchi 20 ta korxona mavjud. Shuningdek, mamlakatimizda respirator ishlab chiqaruvchi korxonalar ham bor bo‘lib, ularning barchasida ishlab chiqarish quvvati kuchaytirilgan va ular uzluksiz tartibda ishlab turibdi. Bundan tashqari, ishlab chiqarishga qo‘shimcha ravishda yurtimizda tekstil korxonalar ham dokadan qatlamli gigiyenik niqoblarni ishlab chiqarishni yo‘lga qo‘ygan. 

“O‘ztekstilsanoat” uyushmasiga a'zo korxonalar uch turdagi himoya niqoblarining ishlab chiqarilishini kuniga 2 million donaga yetkazmoqda. Sog‘liqni saqlash vazirligi buyrug‘iga binoan, tibbiyot niqoblari tibbiy buyumlar ro‘yxatiga kiritilgan edi. Hozirda, tibbiyot niqoblarni ushbu ro‘yxatdan chiqarish bo‘yicha mazkur buyruqqa o‘zgartirish kiritilmoqda. Undan maqsad himoya niqoblarini ishlab chiqarish jarayonini soddalashtirish va ishlab chiqarishni yanada oshirishdir. 

Tibbiyot xalatlari (kombinezon) ishlab chiqaruvchi korxonalar soni 4 ta bo‘lib, hozirda ular kuniga 7 ming dona kombinezon ishlab chiqarmoqda. Ushbu korxonalarning ishlab chiqarish imkoni kuniga 18 ming dona kombinezonni tashkil qiladi. Shu sabab ham ayni damda ehtiyoj ortgani tufayli, yaqin kunlarda ular to‘la quvvatda ishlay boshlaydi.