Uch yilda 3,6 mln aholiga suv yetkazish uchun pul ajratilgan edi. Amalda bor-yo‘g‘i 30 foiz xonadonga suv borgani ma'lum bo‘ldi

Prezident Shavkat Mirziyoyev 17 iyul kuni ichimlik suvi, kanalizatsiya, kuz-qish mavsumiga tayyorgarlik masalalari bo‘yicha videoselektor o‘tkazdi.

2018 yil 30 noyabrda «O‘zbekiston Respublikasida ichimlik suvi ta'minoti va kanalizatsiya tizimlarini rivojlantirish bo‘yicha qo‘shimcha chora-tadbirlar to‘g‘risida»gi qarori qabul qilingan edi. Prezident matbuot xizmati xabariga ko‘ra, so‘nggi ikki yilda bu sohaga budjetdan 3,7 trillion so‘m ajratilgan.

Bundan tashqari, 48ta loyihaga 1,9 milliard dollar xorijiy kreditlar jalb qilingan.

«Uch yil ichida 3 million 600 ming aholiga suv yetkazish rejalashtirilib, mablag‘ masalasi hal qilib berilgan bo‘lsa-da, amalda amalda bor-yo‘g‘i 30 foiz xonadonga suv borgan.

Kredit qaytimi budjet zimmasiga tushayotgani na tarmoq, na hudud rahbarlarini o‘ylantiryapti. Hokimlar yirik loyihalarni vazirlik qilyapti, deb o‘zlari chetga chiqib olgan», – deya Shavkat Mirziyoyevdan iqtibos keltirdi «O‘zbekiston 24».

Yig‘ilishda berilgan topshiriqqa asosan, endilikda hududiy suv ta'minoti korxonalarida kuzatuv kengashlari tuzilib, ularga viloyat hokimlarining shaxsan o‘zlari rahbarlik qiladi.

«Hokimlar loyihalar sifatli bajarilishiga, mablag‘ning maqsadli sarflanishiga va olingan kredit qaytimiga bir xilda javob beradi», – deyiladi xabarda.