Shimoliy Makedoniyada o‘rmon yong‘inlari sababli inqirozli vaziyat e'lon qilindi

Shimoliy Makedoniya hukumati yirik o‘rmon yong‘inlari sababli bir oyga inqirozli vaziyat rejimini joriy etdi, deb xabar berdi TV24.

Ma'lumotlarga ko‘ra, mamlakatda 10ta yirik o‘rmon yong‘ini qayd etilgan. Eng jiddiy yong‘inlar Pexchevo va Delchevo rayonlarida kuzatilmoqda. Bu yerlarda aholi uylari kuyib kul bo‘lgan.

Mamlakatda yong‘inga qarshi kurashga barcha kuchlar: o‘t o‘chiruvchilar, harbiylar, kommunal soha va o‘rmon xo‘jaligi xodimlari, ko‘ngillilar safarbar qilingan. Serbiya va Bolgariyadan o‘t o‘chiruvchilar yordamga yetib kelgan.

Shuningdek, Sloveniyadan 46 nafar o‘t o‘chiruvchi va 16ta maxsus mashina kelishi kutilmoqda.

«Vaziyat har soatda o‘zgarmoqda. Oldindan biror narsa deyish qiyin, chunki quruq va yuqori harorat hamda shamol olovning tez tarqalishi va yo‘nalishini o‘zgartirishiga sabab bo‘lmoqda», — dedi inqiroz markazi vakili Stoyanse Angelov.