Pokistonda farzandini tuproqqa qo‘yayotgan ota, xaridor izlayotgan afg‘on bolalari va 100 yoshli natsist. Kun suratlari

Kun.uz dunyoning turli chekkalaridagi so‘nggi voqealarga oid suratlarni jamladi.

Pokistondagi vayronkor zilzila

Aholi zilziladan vayron bo‘lgan uydagi yaroqli narsalarni to‘plamoqda. Harnay, Belujiston, Pokiston, 7 oktabr. REUTERS/Naseer Ahmed

Pokistonning Belujiston viloyatida 5,9 magnitudali zilzila yuz berishi oqibatida kamida 20 kishi halok bo‘ldi va 300ga yaqin kishi jarohatlandi. Jabrlanganlarning aksariyati ayollar va bolalardir. zilzila Kvetta, Sibi, Xarnay, Pishin, Killa Sayfulla va boshqa shaharlarga ta'sir qilgan. Mahalliy seysmologik markaz ma'lumotlariga ko‘ra, zilzila episentri Xarnaydan unchalik uzoq bo‘lmagan, shuning uchun shahar eng jiddiy zarar ko‘rgan, eng ko‘p qurbonlar ham shu yerda qayd etilgan.

Zilzila qurboni bo‘lgan farzandini ko‘tarib turgan ota dafn marosimida. Belujiston, Harnay, 7 oktabr. REUTERS/Naseer Ahmed

Harnaydagi zilzilada yaralangan bolasini ko‘tarib Kvettadagi shifoxonaga kelgan ota. REUTERS/Stringer

Odamlar zilzila hududiga kelgan qutqaruv vertolyoti tashlab ketgan dori-darmonlarni olishmoqda. REUTERS / Naseer Ahmed

Afg‘onistonda qolayotganlar

«Tolibon» rasmiylari o‘z fuqarolariga yana pasport berishni boshlaganini e'lon qilganidan keyin pasport idorasi oldida yig‘ilgan afg‘onlar.
REUTERS/Jorge Silva

Niqobdagi afg‘on ayoli go‘zallik saloni oldida. Salon egasi reklamalardagi ayollarning yuzini bejab tashlashga majbur bo‘lgan. REUTERS/Jorge Silva

Afg‘on erkaklari Kobuldagi valuta ayirboshlash shoxobchasi oldida. REUTERS/Jorge Silva

Shar sotuvchi bolalar xaridor izlab Kobul ko‘chalari bo‘ylab kezmoqda. AFP/Wakil Kohsar

Germaniyada Ikkinchi jahon urushi vaqtida Berlin yaqinidagi Zaksenxauzen konslagerida qo‘riqchi bo‘lib ishlagan 100 yoshli Yozef S. ustidan sud jarayoni boshlandi. U 3518 kishining o‘ldirilishida ishtirok etishda ayblanmoqda.