"Meduza" asoschisi Timchenko Rossiya rasmiylari tomonidan qidiruvga berildi

Rossiyada Galina Timchenkoga nisbatan «nomaqbul tashkilot faoliyatini tashkil etish» moddasi bo‘yicha ish ochildi.

Galina Timchenko Foto: Ruslan Shamukov/ TASS

Rossiya Ichki ishlar vazirligi "Meduza" internet-nashri asoschisi Galina Timchenko va «Exo Moskvy» radiostansiyasining sobiq xodimi Aleksandr Plyushchevga qidiruv e’lon qildi. 11 iyun, chorshanba kuni Plyushchev o‘zining Telegram-kanalida: «Mana, men ham qidiruvdaman», deb yozdi.

Rossiyada Timchenkoga nisbatan «nomaqbul tashkilot» faoliyatini tashkil etish moddasi bo‘yicha ish ochildi. Rossiya rasmiylari "Meduza"ni shunday tashkilot deb e’lon qildi.

Plyushchev qaysi modda bilan ayblanayotgani noma’lum. Unga nisbatan jinoiy ish qo‘zg‘atilgani haqida rasmiy xabar berilmagan. Shu bilan birga, RIA "Novosti" agentligi avvalroq Plyushchev «chet el agentlari» deb atalgan qonunga rioya qilmagani uchun jinoiy javobgarlikka tortilishini ta’kidlagan edi.

2022 yil oktyabr oyida Rossiya Adliya vazirligi Aleksandr Plyushchevni «chet el agenti» deb e’lon qildi. O‘shandan beri u nashr etayotgan materiallarida tegishli belgilarni qo‘ymagani va faoliyati yuzasidan hisobot taqdim etmagani uchun bir necha bor jarimaga tortilgan.

#Rossiya #Galina Timchenko #Aleksandr Plyushchev