Yanosh Kovach UzAuto Motors bosh direktori etib tayinlandi

“UzAuto Motors” AJ Kuzatuv kengashining qaroriga muvofiq, kompaniya bosh direktori lavozimiga Yanosh Kovach tayinlandi.

U 2021 yildan buyon “UzAuto Motors” AJ Kuzatuv kengashi a’zosi va audit qo‘mitasi a’zosi sifatida faoliyat yuritib kelayotgan edi.

Rasmiy relizga ko‘ra, Vengriyada tug‘ilgan Yanosh Kovach Budapesht texnika universitetining avtomobilsozlik texnologiyalari bo‘yicha muhandislik mutaxassisligini tamomlagan.

U General Motors, Opel, GM Powertrain Uzbekistan, UzAuto Peugeot Citroën Automotive va VinFast Automotive kabi kompaniyalarda rahbarlik lavozimlarida tajribaga ega.

Faoliyati davomida sifatni boshqarish, ishlab chiqarish jarayonlarini optimallashtirish va avtomobil zavodlari boshqaruvi bo‘yicha mas’ul bo‘lgan.

Eslatib o‘tamiz, UzAuto Motors'ni 2021 yil avgustidan 2024 yil oxirigacha shvetsiyalik Bo Andersson boshqardi. Shundan keyin bosh direktor vazifasini bajaruvchi etib “Avtooyna”ning sobiq rahbari Odiljon Bastamqulov ishlab kelayotgandi.

• Ma’lumot uchun, UzAuto Motors'ning yuqori turuvchi tashkiloti – “O‘zavtosanoat” AJni 2023 yil martidan beri Shavkat Umrzoqov boshqarmoqda.