“Aybsiz bo‘lsa, nega yashirinib yuribdi?” – Farg‘ona viloyati IIB restoranga uyushtirilgan “maska-shou”ga izoh berdi

Farg‘ona viloyati IIB Farg‘ona shahridagi “Green club” restoraniga “maska-shou” uyushtirilgani holatiga rasmiy munosabat bildirdi. Unda restoranning tungi paytda belgilangan vaqt orasida ishlashi ko‘zdan kechirilgani aytiladi.  

“Haqiqatan ham 2023 yilning sentabr oyida Farg‘ona shahrida jamoat tartibini saqlash, fuqarolar osoyishtaligini ta’minlash maqsadida viloyatdagi huquq-tartibot organlari rahbarlari boshchiligida o‘tkazilgan tungi reyd tadbirlari doirasida muqaddam bir nechta jinoyat va huquqbuzarlik sodir etilgan, yoshlar tarbiyasiga salbiy ta’sir ko‘rsatuvchi harakatlar ro‘y berganligi uchun aholining haqli e’tiroziga sabab bo‘layotgan Sherzod Abdug‘aniyevga qarashli “Green club” restoranining tungi paytda belgilangan vaqt orasida ishlashi ko‘zdan kechirilib, tegishli tartibda hujjatlar rasmiylashtirilgan.

Bu masalaning bir tomoni. Biroq fuqarolarning firibgarlik jinoyati qurboni sifatida Sherzod Abdug‘aniyev ustidan qilgan murojaatlari yuzasidan qo‘zg‘atilgan jinoyat ishi o‘rganilganda esa fuqaro B.Sh.ning 23 500 AQSh dollari, B.B.ning 32 000 AQSh dollari, S.B. ning 26 000 AQSh dollar, S.Z. ning 16 500 AQSh dollari kabi jami 11 ta holatda ularning pullarini firibgarlik yo‘li bilan o‘zlashtirib, o‘zining shaxsiy ehtiyojlari uchun sarflab yuborganligi aniqlangan”, deyiladi munosabatda.

Shuningdek, rasmiy munosabatda Sherzod Abdug‘aniyev o‘z aybini yashirish, jamoatchilikka jabrdiyda bo‘lib ko‘rinish, chalg‘itish va tergovga ta’sir o‘tkazish maqsadida OAVga murojaat qilgani keltirilgan. 

“Haqiqatan ham Sherzod Abdug‘aniyev aybsiz bo‘lsa, nega unda huquq-tartibot organlaridan yashirinib yuribdi? Nega uning ustidan 11 nafar shaxs buzilgan huquqlarini tiklash, qonun ustuvorligi ta’minlanishini istab ariza yozgan? Jamoatchilikni ayni holatlarga ham diqqat qaratishlarini so‘raymiz”, deya ta’kidlagan boshqarma. 

Qo‘shimcha qilinishicha, hozirda fuqaro Sherzod Abdug‘aniyevga nisbatan Jinoyat kodeksining 168-moddasi 4-qismi “a” bandi bilan jinoyat ishi qo‘zg‘atilib, “qamoqqa olish” ehtiyot chorasi qo‘llangan holda qidiruv e’lon qilingan. Boshqarma Abdug‘aniyev Sherzod Adhamjon o‘g‘lidan jabrlangan fuqarolardan yaqin oradagi IIOga yoki 102 raqamiga murojaat qilishni so‘ragan. 

Kun.uz avvalroq Farg‘ona shahridagi restoranlardan biriga “maska-shou” uyushtirilgani haqida surishtiruv e’lon qilgandi. Qurollangan niqobli xodimlarga viloyat IIB boshlig‘i Azizbek Ikromov hamda viloyat prokurori Baxtiyor Ismoilov boshchilik qilgan. 2023 yil sentabrdagi hodisada viloyat prokurori tezkor vakilga restoran rahbarini “narkotik tashlab tiqish”ni buyurgan. Uning bu topshirig‘i kuzatuv kameralariga yozilib qolgan.