Dunyoning yashash uchun eng qulay shaharlari reytingi e’lon qilindi

Britaniyaning The Economist jurnali tahliliy bo‘limi – Economist Intelligence Unit (EIU) dunyoning yashash uchun eng qulay shaharlari reytingini e’lon qildi.

Reytingda dunyoning 173 shahri barqarorlik, atrof-muhit, sog‘liqni saqlash, infrastruktura va ta’lim ko‘rsatkichlari bo‘yicha 100 balli tizimda baholandi.  

Kopengagen 2025 yil yashash uchun eng qulay shahar deb topildi. Avstriya poytaxti barqarorligi, yaxshi infratuzilmasi, sifatli ta’lim va sog‘liqni saqlash xizmati, shuningdek, ko‘plab madaniy va ko‘ngilochar tadbirlar tufayli yetakchilikni qo‘lgan kiritgan.

Ikkinchi o‘rinda Vena va Tsyurix, uchinchi o‘rinda esa Melburn qayd etilgan. Eng yaxshi o‘nlikka, shuningdek, Jyeneva, Sidney, Osaka, Oklend, Adelaida va Vankuver kirdi.

Reytingda so‘nggi o‘rinni Suriyaning Damashq shahri egalladi. Bundan tashqari, yashash uchun noqulay shaharlar o‘ntaligiga Tripoli, Dakka, Karachi, Jazoir, Lagos, Xarare, Port-Morsbi, Kiyev va Karakas kirdi.

Economistʼning qayd etishicha, dunyodagi beqarorlik tufayli shaharlardagi turmush sharoitlari ketma-ket ikkinchi yil yaxshilanmayapti. 2022-2024 yillarda ketma-ket uch yil reytingda yetakchilik qilgan Vena oldi olingan ikkita terakt — biri amerikalik qo‘shiqchi Teylor Sviftning konsertida, ikkinchisi temiryo‘l vokzalida — tufayli birinchi o‘rindan mahrum bo‘lgan.

Qo‘shimcha qilinishicha, kichikroq shaharlar reytingda odatda yuqoriroq o‘rinlarda joylashadi. Eng yaxshi 20 ta shaharning faqat uchtasida 6 milliondan ortiq aholi istiqomat qiladi. Masalan, London va Nyu-York mos ravishda 54 va 69-o‘rinlarda. Bu shaharlarda jinoyatchilik darajasi va terrorizm xavfi yuqori, yo‘llar ham tirband. Dunyoning eng yirik shaharlaridan biri Tokio esa 13-o‘rinni egallagan. 

Shuningdek, 2024 yilda 5-o‘rinni egallagan Kalgari bu yil 18 o‘ringacha, Toronto esa 12-o‘rindan 16-o‘ringa tushib ketgan. Kanada shaharlarining bunday jiddiy pastlashi tibbiyot muassasalari va shifoxonalardagi xodimlar etishmasligi natijasida yuzaga kelayotgan uzoq navbatlar bilan bog‘langan.

Toshkent reytingning eng quyi pog‘onalarida qayd etilgan. O‘zbekiston poytaxti 100 ballik tizimda 50 dan 60 ballgacha to‘plagan holda och kulrang rangdagi mamlakatlar qatoridan joy olgan. Bu taxminan 145-160 o‘rinlar oralig‘iga to‘g‘ri kelishi mumkin.