Rossiya dronlari Odessani, Ukraina Bryanskdagi arsenalni o‘qqa tutdi

Ukraina

Rossiya qo‘shinlari 28 iyunga o‘tar kechasi Odessaga dronlar bilan hujum qildi. Dron urilishi oqibatida 21 qavatli uyning bir necha qavatidagi kvartiralarda yong‘in chiqqan. Oilaviy juftlik halok bo‘lgan. Qutqaruvchilar yonib ketgan kvartiralardan biridan ularning jasadlarini olib chiqqan. «Suspilne»ning yozishicha qurbonlar Mixaylovskiy litseyi o‘qituvchisi Katerina Borsinskaya va uning turmush o‘rtog‘i Valentin.

Odessa oblasti prokuraturasi ma’lum qilishicha, Rossiya dronlari hujumi oqibatida xususiy uydagi xo‘jalik binolari, ma’muriy bino, xususiy korxonaning omborxonalari, ishlamayotgan yoqilg‘i quyish shoxobchasi binosi va avtomobillarga ham zarar yetgan. Prokuratura ma’lumotlariga ko‘ra, 17 kishi, jumladan uch, yetti va 14 yoshli bolalar jabrlangan.

Rossiya

Ukraina mudofaa vazirligi bosh razvedka boshqarmasi dronlar Bryanskdagi arsenalga hujum qilganini ma’lum qildi

Ukraina dronlari 28 iyun kuni ertalab Bryanskdagi harbiy obektlarga zarba berdi, deb yozadi «Ukrainskaya pravda» mamlakat mudofaa vazirligi bosh razvedka boshqarmasidagi manbalariga tayanib.

Boshqarma ma’lumotlariga ko‘ra, dronlar Rossiya mudofaa vazirligi Bosh raketa-artilleriya boshqarmasining 120-arsenal obektlariga zarba bergan. Zarar ko‘lami aniqlashtirilmoqda.

Bryanskdagi nashrlarda shahardagi portlashlar haqida xabarlar paydo bo‘ldi. Bryansk oblasti rahbari Aleksandr Bogomaz 28 iyun kuni o‘z telegram-kanalida region hududida «topilgan va yo‘q qilingan» dronlar haqida uchta xabar e’lon qilgan. Bogomazning postlaridan ma’lum bo‘lishicha, Bryansk oblasti ustida jami 11 ta dron urib tushirilgan. Qqurbonlar va vayronagarchiliklar yo‘qligi aytilgan.

Qrimdagi Rossiya harbiy aerodromi hududida yong‘inlar qayd etildi. UXX dronlar hujumi muvaffaqiyatli bo‘lganini ma’lum qilgan

Ukraina Xavfsizlik xizmati 28 iyunga o‘tar kechasi Qrimdagi Kirovskiy harbiy aerodromiga zarba berdi. UXX xabarida ta’kidlanishicha, uchta vertolyot – Mi-8, Mi-26 va Mi-28 hamda «Pansir-S1» zenit raketa-to‘p kompleksini yo‘q qilishga muvaffaq bo‘lingan.

«Krimskiy veter» telegram-kanali obunachilari va sun’iy yo‘ldoshdan olingan suratlarga tayanib, aerodrom hududida yong‘inlar qayd etilganini ma’lum qildi.

Rossiya mudofaa vazirligi 28 iyunga o‘tar kechasi Qrim hududi ustida to‘qqizta dron urib tushirilganini ma’lum qildi. Rossiya harbiy idorasi Kirovskiyga berilgan zarba haqidagi xabarlarga izoh bermadi.