Germaniya TIV rahbari Xitoyni Moskvaga ta’sir o‘tkazishga chaqirdi

Germaniya tashqi ishlar vaziri Yoxann Vadeful Pekinni Ukrainaga qarshi urushni to‘xtatish uchun Rossiyaga ta’sir o‘tkazishga chaqirdi. Germaniya tashqi ishlar vaziri 3 iyul, payshanba kuni Berlinda xitoylik hamkasbi Van I bilan uchrashdi.

«Men Putinning urushi bizning xavfsizligimizga bevosita tahdid solayotganini aniq aytdim», dedi nemis siyosatchisi.

«Shuning uchun Rossiyani zarur harbiy materiallar bilan ta’minlashga xalaqit berib, bu urushni olib borishga yo‘l qo‘ymasligimiz kerak», — dedi u Xitoyning Rossiya harbiy-sanoat kompleksini moddiy jihatdan qo‘llab-quvvatlashiga ishora qilib.

«Xitoy Xalq Respublikasidan Rossiyaga bunday tovarlar yetib bormasligi va pirovardida bu urushni qo‘llab-quvvatlashni to‘xtatish uchun hamma narsani qilish qanchalik muhimligini yana bir bor ta’kidladim», — dedi u. Pekin bu ayblovlarni rad etdi, deya xabar beradi Reuters.

BMT Xavfsizlik Kengashining doimiy a’zosi sifatida Xitoy tinchlik va xavfsizlik uchun global mas’uliyatni o‘z zimmasiga olishi kerak, deya qo‘shimcha qildi vazir. «Endi Rossiya muzokaralar stoliga o‘tirishi kerak. Ukraina bunga tayyor», — deya qo‘shimcha qildi u.

Vadeful Germaniya Tayvan bo‘g‘ozini barqarorlashtirish uchun «yagona Xitoy» siyosatiga amal qilishda davom etishini ta’kidladi.

«Tayvan va Janubi-Xitoy dengizidagi vaziyatga kelsak, shuni aytmoqchimanki, u yerda keskinlashuv nafaqat Xitoy yoki Osiyoga, balki butun dunyoga va bizning manfaatlarimizga ta’sir qiladi», — deya ta’kidladi Germaniya tashqi ishlar vaziri.