Ukrainaning O‘zbekistondagi elchisi Mikola Doroshenko diplomatik missiyasini yakunlamoqda

Ukrainaning favqulodda va muxtor elchisi Mikola Doroshenko O‘zbekistondagi diplomatik missiyasini yakunlamoqda. Bu haqda u Facebook ijtimoiy tarmog‘idagi sahifasida ma’lum qildi.

«Ukraina prezidenti Volodimir Zelenskiy diplomatik korpus rotatsiyasi doirasida mening O‘zbekistondagi missiyamni yakunlash to‘g‘risida farmon qabul qildi. Bu mamlakatim rahbariyatiga, xalqimga bo‘lgan ishonchning eng yuqori darajasi va men buni oqlash uchun qo‘limdan kelganini qildim», – deb yozdi u.

U O‘zbekistondagi faoliyati davomida mamlakat uchun og‘ir damlarda uning manfaatlarini ifodalash va himoya qilish sharafiga muyassar bo‘lganini qayd etgan.

«Ishimga baho berish huquqini boshqalarga qoldiraman, o‘z nomimdan faqat shuni aytamanki, qilgan ishim uchun uyalmayman… Mening vazifam haqiqatni aytish, haqiqatni o‘zbek jamiyatiga yetkazish, ularga bugungi kunda Ukraina qanday yashayotganini tushuntirish edi. Umid qilamanki, mehnatim tufayli o‘zbek muhitida haqiqat urug‘lari ko‘proq unib chiqadi. Chuqur motivatsiya va bor kuchim bilan Ukraina va O‘zbekiston o‘rtasidagi hamkorlikni rivojlantirishga hissa qo‘shdim», – dedi u.

U o‘zbekistonliklarga hamkorlik va Ukrainani qo‘llab-quvvatlayotgani uchun minnatdorlik bildirgan.

Mikola Doroshenko 2020 yil aprelida Ukrainaning O‘zbekistondagi elchisi etib tayinlangandi.

21 iyul kuni Ukraina prezidenti Volodimir Zelenskiy mamlakatning xorijiy davlatlar va xalqaro tashkilotlardagi 16 nafar elchisini tayinladi. O‘zbekistondagi yangi elchini tayinlash to‘g‘risidagi farmon davlat rahbari saytida hozircha e’lon qilinmagan.