O‘zbekistonda ayollar startaplari uchun ilk milliy akselerator dasturi ishga tushirildi

Ushbu tashabbus Raqamli texnologiyalar vazirligi ko‘magida amalga oshirilmoqda va ayollarning g‘oyalarini real biznesga aylantirishlariga ko‘maklashuvchi tizimli treninglar, murabbiylik, hamjamiyat qurish tadbirlarini taklif qiladi.

Rasmiy relizga ko‘ra, dastur O‘zbekistonning barcha hududlaridagi ayollar uchun startaplar olamiga kirish eshigini ochadi.

Ishtirokchilar master-klasslarda qatnashadi, tajribali murabbiylardan maslahatlar oladi va o‘zaro fikrlashuvchi ayollar tarmog‘iga qo‘shiladilar.

Dastur amaliy loyiha ishlab chiqish jarayonini o‘z ichiga oladi va ommaviy taqdimotlar bilan yakunlanadi. Eng faol qatnashchilar keyingi bosqichda murabbiylik va rivojlanish imkoniyatlariga ega bo‘ladi.

Dasturning ochilishi Pitch&Rise nomli tadbir orqali nishonlandi. Ushbu tadbir Raqamli texnologiyalar vazirligi hamda Startup Garage platformasi hamkorligida tashkil etildi. Bir necha ayol tadbirkorlar o‘z g‘oyalarini taqdim etdi. G‘oliblarga AT sohasida yoshlar, ayollar va frilanserlar bilan ishlash hamda O‘zbekistonni mintaqaviy AT markaziga aylantirish bo‘yicha maslahatchi Kamola Sobirova tomonidan mukofotlar topshirildi.

“O‘zbekiston jadal rivojlanmoqda, va ayollar bu jarayonning markazida turishmoqda, – dedi Kamola Sobirova. – Startaplardan raqamli texnologiyalargacha ayollar o‘z o‘rnini mustahkamlab bormoqda. Ayollarga qaratilgan dasturlar va Pitch & Rise kabi tadbirlar ularning yetakchilikka tayyorligini yaqqol ko‘rsatmoqda”.

“SG Women bu shunchaki dastur emas – bu bayonot, – dedi Startup Garage asoschisi Muhammad Xalil. – Biz O‘zbekistonning har bir burchagidan chiqqan ayollar real bizneslar yaratadigan, o‘ziga ishonch hosil qiladigan va innovatsiyalar sohasida yetakchilikka intiladigan muhitni barpo qilyapmiz. Ulkan ochilmagan salohiyat bor, bu esa endigina boshlanishi”.

Tashabbus doirasida muntazam uchrashuvlar, muvaffaqiyatli ayol asoschilar bilan podkastlar hamda norasmiy tarmoq tadbirlari o‘tkaziladi. Barcha faoliyatlar ayollarga ochiq, inklyuziv va barcha hududlarni qamrab oluvchi tarzda ishlab chiqilgan, shu sabab yirik shaharlardan uzoqda yashovchi ayollar ham birdek imkoniyatga ega bo‘ladi.