Донбасс шимоли олов ичида, Киев метросида концерт. Уруш суратлари

Урушнинг 74-кунида Украинага юқори мартабали кишилар ташрифи кузатилди. «Крешчатик» метро бекатида U2 гуруҳи концерт берди, президент Володимир Зеленский машҳур сапёр ит Патрон билан биргаликда Канада бош вазири Жастин Трюдони кутиб олди. Аммо уруш тўхтамаяпти — россиялик ҳарбийлар Донбасс шимолидаги шиддатли жанглар вақтида вайронага айланган Попасная шаҳрини эгаллагани хабар қилинди.

АҚШнинг биринчи хоними Жилл Байден Украинанинг Словакия билан чегараси яқинидаги Ужгород шаҳрида Володимир Зеленскийнинг рафиқаси Олена Зеленская билан учрашди. AP Photo/Susan Walsh, Pool

Украинадаги уруш. Сўнгги маълумотлар

Сўнгги кунларда Украинадаги қатор манбалар россиялик ҳарбийлар Луганск областида сезиларли натижаларга эришаётгани ҳақида хабар берган бўлса-да, Украина қуролли кучлари бош штабининг эрталабки маълумотномасида фронт чизиғида ўзгариш йўқлиги айтилган:

Изюм атрофида, Славянскдан 30 километр шимоли-ғарбда жойлашган районда россиялик ҳарбийлар ҳамон жанубга юришга ҳаракат қилмоқда.
Украинанинг Харков области билан чегарадош бўлган Белгород областида 19 та батальон-тактик гуруҳлар жамланган.
Бош штабнинг ёзишича, Донецк йўналишида «душман асосий саъй-ҳаракатларини Рубежное ва Попасная аҳоли пунктларини эгаллашга қаратган, Северск, Славянск, Лисичанск ва Авдеевка аҳоли пунктларига юриш қилишга тайёрланмоқда». Дам олиш кунларида украин манбалари Попасная мудофааси ёриб ўтилгани учун украин қисмлари бошқа мудофаа чизиғига чекинишгани ҳақида хабар берганди.
Херсон областида фаол ҳарбий ҳаракатлар бўлмаган, фақат отишмалар давом этмоқда.
Бош штаб Донбассда жойлашган Бирлашган кучлар матбуот хизматининг сўнгги бир кундаги ҳарбий ҳаракатлар чоғида душманнинг 20 танки ва 29 та бошқа зирҳли машиналари йўқ қилингани ҳақидаги хабарини такрорлаган.