Харкивда янги мудофаа чизиғи ва Донбассдаги мерганлар. Уруш суратлари

Украинада урушнинг 671-куни ўтди. Асосий маълумотлар:

Украина қуролли кучлари Феодосияда «Новочеркасск» йирик десант кемаси йўқ қилингани ҳақида хабар берди. Россия мудофаа вазирлиги кемага ҳужум фактини тасдиқлаган корабль ва украинларнинг ракета учирган икки самолёти уриб туширилганини маълум қилган. Ижтимоий тармоқларда ҳужум оқибатида буткул яксон этилган кема қолдиқлари суратлари тарқалган. 33 нафар денгизчи бедарак йўқолган деб ҳисобланмоқда.
РФ мудофаа вазири Сергей Шойгу «махсус ҳарбий амалиёт»нинг 2023 йилдаги асосий мақсади украинларнинг қарши ҳужумини бардод қилиш бўлганини ва бу вазифа бажарилганини маълум қилди.
Украина Олий радасига сафарбарлик қоидаларини ўзгартириш тўғрисидаги қонун лойиҳаси киритилди. Унга кўра, чақирув қоғозини электрон шаклда етказиш, ҳарбий хизматдан бўйин товловчиларнинг ҳуқуқларини чеклаш кўзда тутилган.
Украина ҚК бош қўмондони Валерий Залужний украин ҳарбийлари Донецк областининг Марйинка шаҳридан чекинганини тасдиқлади. Россия ушбу шаҳар эгаллангани ҳақида 25 декабр куни эълон қилган, украин томони бу маълумот «тўғри эмаслиги»ни билдирганди.
Туркия парламентининг халқаро ишлар бўйича қўмитаси Швециянинг НАТОга аъзолигини қўллаб-қувватлади. Энди протокол бутун парламент томонидан тасдиқланиши керак, аммо овоз бериш куни ҳозирча аниқ эмас. Туркия бир ярим йилдан ошиқ вақт давомида Швециянинг алянсга қабул қилинишига қарши бўлиб келаётганди.

Украина қуролли кучларининг Харкив остонасидаги мудофаа линияси

Россия қўшини Харкив областида юриш қилишда давом этмоқда. Буни секинлаштириш учун сўнгги ойларда украин ҳарбийлари бу йўналишда янги мудофаа чизиғини барпо этишди — 19 декабр куни йил якунларига бағишланган матбуот анжуманида Володимир Зеленский уни бутун Украинадаги «энг кучли» мудофаа чизиғи деб атади. Мудофаа чизиғи темир бетон бошпаналар, «аждарҳо тишлари», танкка қарши ариқлар, блиндажлар ва бошқа мудофаа истеҳкомларидан таркиб топган.