Суриянинг Идлиб вилояти бутунлай исёнчилар назоратига ўтди — ОАВ

Аввалроқ, улар Ҳалаб шаҳрини эгаллаган эди. Сурия армиясига исёнчилар кириб келган шаҳарнинг асосий ҳудудларидан «хавфсиз чекиниш» бўйича буйруқ берилгани таъкидланмоқда.

Фото: REUTERS/Mahmoud Hasano

Исёнчилар Суриянинг Мараат ан-Нумон шаҳрини эгаллаб олди, Идлиб вилояти тўлиқ исёнчилар назоратига ўтди, деб ёзди Reuters манбаларга таяниб. Аввалроқ Сурия армияси исёнчилар Ҳалаб шаҳрининг катта қисмини эгаллаганини тан олган эди.

Сурия фуқаролик мудофааси, шунингдек, Сурия ва Россия авиацияси Ҳалаб шаҳридаги турар-жойлар, ёқилғи қуйиш шохобчаси ва мактабга ҳаводан зарбалар йўллагани ҳақида хабар берди. Қайд қилинишича, Москва Дамашққа қўшимча ҳарбий ёрдам ҳақида ваъда берган, у яқин 72 соат ичида етиб келиши мумкин.

Сурия армиясига исёнчилар кириб келган шаҳарнинг асосий ҳудудларидан «хавфсиз чекиниш» бўйича буйруқ берилгани таъкидланмоқда.

26 ноябр куни суриялик исёнчилар Ҳалаб шаҳри ва Идлиб вилоятига қарши ҳужум бошлади. Бу 2020 йилдан бери энг катта юриш бўлди. 29 ноябр куни исёнчилар Ҳалабга кирганини маълум қилди. Сурия ҳарбий қўмондонлиги маълумотларига кўра, ҳужумда оғир қуроллар ва учувчисиз самолётларга эга «минглаб хорижий ёлланма жангарилар» иштирок этмоқда.

#Сурия #Ҳалаб #Идлиб

Сурияда қуролли мухолифатнинг 2024 йил 27 ноябридан бошланган кенг кўламли ҳарбий ҳаракатлари орадан 12 кун ўтиб, 8 декабрда Дамашқнинг қулашига олиб келди. Мамлакатда Асадлар сулоласининг 53 йиллик ҳукмронлиги якун топди.