Хоразмда 10 гектар ерни 250 млн сўмга сотишга уринган шахслар ушланди

Улар ҳокимлик захирасида бўлган мазкур ер майдонлари ўзларига тегишли эканига фуқарони ишонтирган. Ҳозирда ҳолат юзасидан жиноят иши қўзғатилган.

Хоразм вилоятида ер талон-торожи билан боғлиқ жиноят фош этилди, деб хабар беради Бош прокуратура матбуот хизмати.

Қайд этилишича, фуқаро Б.Т.нинг Хоразм вилояти ИИББ ЖҚБ Ер ресурслари талон-торож қилинишига қарши курашиш бўлинмасига қилган мурожаатига асосан, вилоят прокуратураси ва бошқа ҳуқуқни муҳофаза қилувчи орган ходимлари билан ҳамкорликда тезкор тадбир ўтказилган.

Тадбир давомида И.Б. исмли шахс ва бошқалар Шовот тумани ҳудудида жойлашган ҳокимлик захирасидаги 10 гектар экин ер майдонини гўёки ўзларига тегишли эканлигига ишонтириб, келгуси йилда шоли экиб, ердан фойдаланиши учун 250 миллион сўмга сотишга келишиб, олдиндан 6,7 минг доллар ва 3,8 миллион сўм пулларни олаётган вақтда ашёвий далиллар билан ушланган.

Мазкур ҳолат юзасидан Жиноят кодексининг 168-моддаси (фирибгарлик) 4-қисми «а» банди билан жиноят иши қўзғатилган. Дастлабки тергов ҳаракатлари ўтказилмоқда.

Аввалроқ Андижон ва Навоий вилоятларида ноқонуний тарзда ер сотмоқчи бўлган шахслар ушлангани, Тошкентда давлат захирасида бўлган 7 сотих ерни 175 минг долларга сотмоқчи бўлган шахс қўлга олингани тўғрисида хабар берилганди.

#Хоразм #шоли #ер савдоси