Россиянинг АҚШдаги янги элчиси тайинланди

Путин Александр Дарчиевни Россиянинг АҚШдаги элчиси лавозимига тайинлаш тўғрисидаги фармонни имзолади.

Фото: РИА Новости

Россия президенти Владимир Путин Александр Дарчиевни РФнинг АҚШдаги фавқулодда ва мухтор элчиси этиб тайинлаш тўғрисидаги фармонни имзолади.

Тайинловга қадар Дарчиев РФ Ташқи ишлар вазирлигининг Шимолий Америка департаменти директори лавозимида фаолият юритган.

27 феврал куни Истанбулда ўтказилган маслаҳатлашувлар чоғида Америка томони Дарчиев Россиянинг АҚШдаги янги элчиси этиб тайинланиши ҳақидаги келишув билан расмий нота тақдим этганди.

Александр Дарчиев ТИВ тизимида 1992 йилдан бери фаолият юритиб келади. У 2005-2010 йилларда Россиянинг АҚШдаги элчихонасида маслаҳатчи бўлиб ишлаган, 2014-2021 йилларда Россиянинг Канададаги элчиси бўлган.

Россиянинг АҚШдаги олдинги элчиси Анатолий Антонов ўз фаолиятини 2024 йил октябрда якунлаган эди. У 2017 йилдан бери элчихонани бошқариб келаётганди.

#элчи #Россия #Александр Дарчиев