Қўшимча функционаллар
-
Тунги кўриниш
1972 йили Венерага учирилган зонд яқин кунларда Ерга қулайди
Оғирлиги тахминан 500 кг ва диаметри 1 метр бўлган модулнинг қулайдиган жойи ноаниқлигича қолмоқда.
1972 йилда Венера сайёрасини тадқиқ қилиш учун учирилган совет Космос-482 коинот кемаси 53 йиллик саёҳатини якунламоқда ва 10 май куни атрофида Ерга назоратсиз қулашга тайёрланмоқда.
Live Science хабарига кўра, сунъий йўлдошлар кузатувчиси Ралф Вандеберг томонидан олинган янги суратлар зонд ортида қандайдир объект борлигини кўрсатмоқда. Катта эҳтимол билан у муваффақиятсиз қўниш чоғида очилиб кетган парашют бўлиши мумкин.
«Венера» дастурининг бир қисми бўлган Космос-482 сайёранинг жазирама юзасига қўниши керак эди, бироқ «Союз» ракетасидаги носозлик туфайли кема икки қисмга бўлиниб кетди. Асосий модул 1981 йилда атмосферада ёниб кетди, қўнувчи модул эса эллиптик орбитада қолди. Оғирлиги тахминан 500 кг ва диаметри 1 метр бўлган модул экстремал шароитларда омон қолиш учун мўлжалланган. Бу эса унга Ер атмосферасига қайта кириш пайтида ёниб кетмаслик имконини беради.
Бироқ, Вандебергнинг қайд этишича, зонд парашютли бўлса ҳам, унинг ёши ва фазодаги шароит ҳисобга олинса, Ерга қулаб тушиши секинлашиши даргумон.
Зонднинг қулаб тушадиган жойи ноаниқлигича қолмоқда: 52 даража қияликдаги орбита Европадан Австралиягача бўлган ҳудудларни қамраб олади. Лекин катта эҳтимол билан зонд океанга қулайди.
