Автомобил импортига экосертификат – утилизацияга қўшимча “бонус”ми?

Ўзбекистонга гибрид электромобилларни олиб киришда экологик сертификат олиш талаби қўйилди. Қўйилди-ю, 3 кунга бормай олиб ташланди. Автомобил импортини қимматлаштирадиган бу сирли чора нега жорий қилинди-ю, нега бекор қилинди – расмийлардан бирор изоҳ бўлмаяпти.

{Yii::t(}

Ўтказиб юбориш 6s

Ўтказиб юбориш

Маълум бўлишича, 1 майдан эътиборан Ўзбекистонга электромобил олиб киришда нафақат утилизация йиғими 4 баробаргача ошган, балки янги харажат – экологик сертификат олиш талаби ҳам пайдо бўлган. Бу сертификат божхонада электромобил деб расмийлаштириладиган гибрид автомобиллар – Lixiang, Leapmotor, Voyah, Deepal, AITO, Neta, Avatr кабиларга тааллуқли бўлиб, машинанинг Евро-4 экологик стандартига жавоб беришини тасдиқлаши керак.

Autodeklarant каналининг ёзишича, экологик сертификат ҳар бир дона автомобил учун алоҳида олишиши, уни олиш учун 2 млн сўмдан кўпроқ тўлов қилиш кераклиги белгиланган. Бу сертификат қайси ташкилот бераётгани, тўлов миқдори қайси асосларга кўра белгилангани каби саволлар очиқ қолмоқда.

Қизиғи шундаки, асосий етказиб берувчи бўлмиш Хитой автосаноати 2018 йилдан бошлаб тўлиқ Евро-5 стандартига мувофиқ автомобил ишлаб чиқаришга ўтган. Шундан кейин 2021 ва 2023 йилларда Хитойда чиқариладиган автомобилларнинг экологик безарар бўлишига нисбатан талаблар янада кучайтирилган. Шунга қарамай, Ўзбекистон расмийлари Хитойдан келаётган автомобилларнинг Евро-4 стандартига мослигини текширишга қарор қилгани ажабланарли.

Лекин афтидан, бу ажабтовур тартибнинг умри узоққа чўзилмади. Autodeklarant каналига кўра, янгилик жорий этилганидан 3 кун ўтар-ўтмай, 3 май куни экологик сертификат талаб қилиш тўхтатилган.

“Божхона ходимлари электромобил сифатида расмийлаштирилаётган гибрид автомобилларга экологик сертификат олиш эндиликда талаб қилинмаслигини айтишди”, – дея ёзди канал муаллифи Азизбек Бердиев.

Шу куни Олий Мажлис Сенати баёнот бериб, бу масалада экология вазирига сўров юборилганини маълум қилди. Сенатнинг расмий муносабатида бу мавзу муҳокамаларга сабаб бўлгани бежиз эмаслиги, чунки Ўзбекистонга кириб келаётган гибрид электромобиллар Евро-5 ёки Евро-6 экологик стандартларига жавоб бериши айтилади.

Сенатнинг қайд этишича, Вазирлар Маҳкамасининг 2020 йилдаги 50-сон қарори билан, экологик сертификатлаш тартиби белгиланган. Унга кўра, аккредитациядан ўтган синов лабораторияси мавжуд бўлганда, экологик хавфсизлик мезонларига мувофиқлик текширилиши керак. Агар лаборатория мавжуд бўлмаса, транспорт воситаси идентификация йўли билан баҳоланиши мумкин.

Бу масалада парламент юқори палатасининг Аграр, сув хўжалиги масалалари ва экология қўмитаси раиси Анвар Туйчиев экология вазири Азиз Абдуҳакимовга сенатор сўрови юборган. Сўровда экологик сертификатнинг ҳуқуқий асослари қанчалик мустаҳкамлиги савол остига олинган, шунингдек, белгиланган тўлов миқдорига аниқлик киритиш сўралган.

Эслатиб ўтамиз, ўтган йили 1 ноябрдан эътиборан якка тартибда олиб кирилган автомобиллар учун Пискентдаги лабораторияда мажбурий электромагнит мослашувчанлик текшируви жорий этилди. Бу эса бир неча ойлик навбатларга олиб келди.

Кейинроқ Leapmotor автомобилларидан бири бу текширувдан ўта олмагани важи билан, бу брендга мансуб барча автомобиллар импорти тўхтатиб қўйилди ва бу тақиқ 3 ҳафта давом этди.