Колумбия Панама собиқ президентига бошпана тақдим этди

Колумбия ҳукумати бир йилдан ошиқ вақтдан бери Никарагуа элчихонасида яшириниб келаётган Панама собиқ президенти Рикардо Мартинеллига бошпана тақдим этди. Бу ҳақда мамлакат Ташқи ишлар вазирлиги хабар берди.

«Колумбия президенти Густаво Петро Уррего Панама собиқ президенти Рикардо Алберто Мартинелли Беррокалга сиёсий бошпана тақдим этди ва ушбу қарор тегишли тартибда қўшни мамлакат ҳукуматига етказилди», — дейилади хабарда.

Қайд этилишича, ушбу қарор инсонни ҳимоя қилиш тамойилига ва Колумбиянинг сиёсий сабабларга кўра таъқибга учраган шахсларга ёрдам кўрсатиш анъаналарига асосланган.

Рикардо Мартинелли 2009-2014 йиллар давомида Панама президенти бўлган. У 2024 йил 7 февралдан бери Никарагуанинг Панамадаги элчихонасида яшириниб келаётган эди. Бунга суд собиқ президентга нисбатан New Business деб номланган схема доирасида Grupo Editorial Epasa медиа конгломератини харид қилиш учун давлат маблағларини нотўғри сарфлаганлик айби билан якуний ҳукм чиқаргани сабаб бўлган.

Мартинеллига 128 ой қамоқ жазоси тайинланган, шунингдек, 19,2 миллион доллар миқдорида жарима тўлаши белгиланган. Суд бундан ташқари, унинг президентлик сайловларида иштирок этишини ҳам тақиқлаган — Мартинелли «Мақсадлар сари» партиясидан давлат раҳбарлигига номзод эди. Сайловолди пойгасида унинг ўрнини Хосе Раул Мулино эгаллади ва натижада ғалаба қозониб, Панама президентига айланди.