ЕИ Россияга бир вақтнинг ўзида тўртта санкция режимини қўллайди

Европа Иттифоқи Россияга қарши бир вақтнинг ўзида бир нечта санкцияларни қўллашнинг «энг йирик» дастурини тайёрлади, деб хабар берди Брюссел. 17-пакетга қўшимча равишда 18-пакет ҳақида ҳам эълон қилинган.

Фото: AP

Евроиттифоқ Россияга қарши бир вақтнинг ўзида бир неча санкция режимларининг «тарихдаги энг йирик» қўлланишини тайёрламоқда, у ЕИ ташқи ишлар кенгашининг 20 май куни бўлиб ўтадиган йиғилишида эълон қилинади. Бу ҳақда 16 май, жума куни Брюсселда бўлиб ўтган брифингда ЕИнинг юқори мартабали расмийси маълум қилди.

Ташқи ишлар вазирлари Россия Федерациясига нисбатан тўртта санкция режими доирасида чекловчи чораларни маъқуллайди: Украинадаги уруш, инсон ҳуқуқларини бузганлик, гибрид уруш ва кимёвий қурол қўллаганлик учун.

Жами 130 дан ортиқ индивидуал санкциялар, жумладан, Россия ҳарбий-саноат комплекси, «соядаги флоти» ва унинг шерикларига, учинчи давлатлардан Россияга санкция остидаги товарларни етказиб берувчиларга, шунингдек, ташвиқот ва дезинформация тарқатувчиларга нисбатан қабул қилинади.

Россиянинг Украинадаги тажовузи учун 17-санкция пакети доирасида санкциялар рўйхатига 75 та янги юридик ва жисмоний шахслар, шунингдек, 200 та «соядаги флот» кемалари киритилади. Шундай қилиб, Европа Иттифоқининг ушбу санкциялар рўйхатидаги шахслар сони 2500 дан, кемалар сони эса 300 дан ошади, деди расмий.

Гибрид фаолият учун Европа Иттифоқининг санкциялар режими доирасида Россия Федерациясида 27 жисмоний ва юридик шахсларга нисбатан тармоқ чоралари, шунингдек, индивидуал санкциялар жорий этилади.

#Европа Иттифоқи #Россия