АҚШда America Party'ни рўйхатдан ўтказиш учун ариза топширилди

6 июл, якшанба куни АҚШ Федерал сайлов комиссияси (FEC) маълумотлар базасида Америка партиясини яратиш учун ариза пайдо бўлди. Уни америкалик миллиардер, SpaceX ва Tesla асосчиларидан бири Илон Маск топширганми ёки йўқми номаълум. Маскнинг ўзи ҳужжатлар топширилганини ҳали тасдиқламади. Номзод сифатида миллиардер Илон Маск, ғазначи сифатида эса Tesla компаниясининг бош молия директори, ҳиндистонлик Вайбхав  Танежа қайд этилган.
 
Бундан ташқари, маълумотлар базасида Америка партияси Миллий қўмитаси, шунингдек, Х ва DOGE партияларини (иши Маск томонидан бошқарилган Department of Government Efficiency - Ҳукумат самарадорлиги департаменти худди шу номга эга эди) яратиш учун аризалар мавжуд. Бу аризаларни айнан ким топширгани ҳам номаълум.

Июн ойи охирида Маск АҚШ президенти Доналд Трампнинг федерал харажатларни қисқартирувчи, бироқ айни пайтда жиддий солиқ имтиёзларини назарда тутувчи қонун лойиҳасига рози бўлмаган бир пайтда АҚШда янги сиёсий партия ташкил этишни таклиф қилиб, мамлакат ҳозирда «бир партияли» эканини таъкидлади.

6 июл куни АҚШ президенти Доналд Трамп ўзининг собиқ тарафдори, миллиардер Илон Маскнинг ўз партиясини яратиш ғоясига изоҳ берди. Оқ уй раҳбари Ню-Жерсидаги гольф клубидан Вашингтонга кетаётиб, журналистларга: "Учинчи партиялар ҳеч қачон ишламаган, шунинг учун у бу билан ўйин қилиши мумкин, лекин менимча, бу кулгили", деди.

Кейинроқ Трамп ўзининг Truth Social ижтимоий тармоғида Маск «бутунлай ақлини йўқотганини» ёзди. Президентнинг таъкидлашича, Қўшма Штатларда учинчи партия яратишга уринишлар ҳеч қачон муваффақият қозонмаган, чунки Қўшма Штатлардаги икки партиявий сиёсий тизим «улар учун ишламаяпти». «Учинчи партиялар учун яхши бўлган ягона нарса — бу тўлиқ тартибсизликни яратиш ва биз ўз ишончини ва ақлини йўқотган радикал сўл демократлар билан етарли даражада буни кўрдик!» — деди Трамп.