Германия Исроилга қурол экспортини қисман тўхтатди

Исроил бош вазири Бинямин Нетаняҳу Фаластиннинг ҲАМАС гуруҳига қарши кураш режасини эълон қилгани, у Ғазо шаҳри устидан назоратни ўз ичига олиши маълум бўлганидан бир неча соат ўтиб, Германия ҳукумати Исроилга қурол етказиб беришни қисман тўхтатганини эълон қилди. Германия канцлери Фридрих Мерц 8 август, жума куни Исроилга қирғоқ чизиғида ишлатилиши мумкин бўлган ҳарбий техника экспорти тўхтатилаётганини билдирди.

Германия Ғазо секторида қўлланиши мумкин бўлган ҳарбий техникани Исроилга «кейинги хабарномагача» экспорт қилишга рухсат бермайди», деди Германия канцлери. У, шунингдек, «Исроил армиясининг Ғазо секторида Исроил вазирлар маҳкамаси қарор қилган янада қатъий ҳарбий ҳаракатларига» ишора қилди.

Мерцнинг сўзларига кўра, Германия ҳукумати Ғазо секторида тинч аҳолининг азобланиши давом этаётганидан қаттиқ хавотирда. У янги ҳужумни бошлагани сабабли, Исроил ҳукумати қирғоқ аҳолиси таъминоти учун янада катта масъулиятни ўз зиммасига олади ва гуманитар ёрдам, жумладан, БМТ ва бошқа ташкилотлардан етказилишини таъминлаши керак, деди у.

Шу куни эрталаб Исроил хавфсизлик маҳкамаси Фаластиннинг ҲАМАС ҳаракатини «мағлубиятга учратиш» ва Ғазо шаҳри устидан назорат ўрнатиш режасини маъқуллади. Бу қарор Исроил юқори мартабали амалдорларининг тунги учрашувидан сўнг – урушни тўхтатиш бўйича халқаро чақириқлар кучайиб бораётганига ва ҲАМАС томонидан гаровга олинганлар тақдиридан қўрққан кўплаб исроилликларнинг норозиликларига қарамай қабул қилинди.