Toshkent viloyatida maxsus yuk avtomobili yonib ketdi

Toshkent viloyati Yuqori Chirchiq tumanida yuk avtomobilida yong‘in kelib chiqdi.

Viloyat YHXB xabariga ko‘ra, hodisa 12 may kuni soat taxminan 09:30 larda tuman hududidan o‘tgan D-014 «G‘azalkent shahri — Chirchiq shahri — Yangibozor qishlog‘i — Jumabozor qishlog‘i — O‘rtasaroy qishlog‘i — Nurafshon shahri» avtomobil yo‘lining 46-kilometrida sodir bo‘lgan.

Unda haydovchi, 1973 yilda tug‘ilgan K.Sh boshqaruvidagi «Toza hudud DUK»ga qarashli Isuzu maxsus yuk avtomobilining dvigatel qismida qisqa tutashuv tufayli yong‘in kelib chiqqan.

O‘t o‘chiruvchilar tomonidan yong‘in to‘liq o‘chirilgan. Yong‘in oqibatida harakat ishtirokchilari sog‘lig‘iga ziyon yetmagan.

Hozirda xolat yuzasidan Yuqori Chirchiq tumani FVB tomonidan surishtiruv ishlari olib borilmoqda.