YeI davlatlari yangi mudofaa jamg‘armasi bo‘yicha kelishib oldi

Yevropa Ittifoqiga a’zo davlatlar Yevropa mudofaasini mustahkamlash uchun 150 milliard yevrolik (168,3 milliard dollar) Security Action for Europe (SAFE) jamg‘armasini yaratishga prinsipial kelishib oldilar. Bu haqda 19 may, dushanba kuni Reuters va Britaniyaning Financial Times (FT) gazetasi xabar berdi.

Yevropa Ittifoqi diplomatining Reuters agentligiga aytishicha, Yevropa Komissiyasi tomonidan mart oyida taklif qilingan jamg‘arma birgalikda qarz olish yo‘li bilan moliyalashtiriladi va Yevropa Ittifoqi a’zolari va boshqa mamlakatlarga, xususan, Ukrainaga mudofaasini mustahkamlash va Yevropa qurol sanoatini rivojlantirish tashabbuslari uchun kreditlar ajratadi.

Bryusseldan olingan kreditlar Yevropani qayta qurollantirishga qaratilgan qo‘shma xaridlar orqali qurol tizimlariga sarflanishi mumkin.

Bir necha oy davom etgan muzokaralardan so‘ng, 19 may kuni ertalab bu taklif siyosiy jihatdan ma’qullandi, dedi FT agentligiga uch manba. Rasmiy qaror 21 may kuni e’lon qilinadi, deya aniqlik kiritdi nashr manbalari.