Tramp: Eron va Isroil o‘rtasidagi kelishuv uchun vaqt keldi

AQSh prezidenti Donald Tramp Eron va Isroil kelishuvga erishib, harbiy harakatlarni to‘xtata olishiga umid bildirdi. «Umid qilamanki, kelishuvga erishiladi. O‘ylaymanki, kelishuv vaqti keldi va biz nima bo‘lishini ko‘ramiz. Ba’zan, birinchi navbatda, kurashib ko‘rish kerak, lekin nima bo‘lishini ko‘ramiz», — dedi u 15 iyun, yakshanba kuni Kanadadagi G7 sammitiga jo‘nab ketishdan oldin jurnalistlar bilan suhbat chog‘ida.

Oq uy rahbari Qo‘shma Shtatlar Isroil mudofaasini qo‘llab-quvvatlashda davom etish niyatida ekanini ma’lum qildi. Biroq Amerika rahbari mamlakatning Eronga zarbalarini to‘xtatishni so‘ragani yoki so‘ramagani haqida ma’lumot bermadi.

Eron va Isroil Hindiston va Pokiston misolida harbiy harakatlarni to‘xtatish bo‘yicha kelishuv tuzishi kerak, deb yozdi Tramp Truth Social ijtimoiy tarmog‘ida. O‘z postida Oq uy rahbari birinchi prezidentlik davrida Serbiya va Kosovo o‘rtasidagi mojaroning urushga aylanib ketishining oldini olganini aytdi. Bundan tashqari, Tramp Misr va Efiopiya o‘rtasidagi tinchlikni o‘zining xizmatlari bilan bog‘ladi.

«Xuddi shunday, biz tez orada Isroil va Eron o‘rtasida tinchlikka erishamiz! Hozir ko‘p telefon qo‘ng‘iroqlari va uchrashuvlar bo‘lyapti. Men juda ko‘p ish qilyapman, lekin buni hech qachon gapirmayman – odamlar tushunyapti», deb yozadi u. AQSh prezidenti o‘z postining oxirida Yaqin Sharqqa buyuklikni qaytarishga chaqirdi.