Farmatsevtika mahsulotlarini sertifikatlashtirish tartibi o‘zgardi

Ushbu o‘zgartirishlar mahsulot xavfsizligini kuchaytirish, sertifikatlashtirish jarayonining shaffofligini ta’minlash, sertifikat berishni rad etish va ularni bekor qilish uchun qo‘shimcha asoslarni joriy etish, shuningdek, ma’muriy jarayonlar muddatini optimallashtirishga qaratilgan.

Hujjatga quyidagi o‘zgartirishlar va qo‘shimchalar kiritildi:

– birinchidan, sertifikatlashtirishni rad etish asoslari kengaytirildi. Endi sertifikat quyidagi hollarda ham rad etilishi mumkin:
• mahsulot davlat ro‘yxatidan o‘tkazilishi lozim bo‘lsa-yu, bu amalga oshirilmagan bo‘lsa (ro‘yxatdan o‘tkazilmasdan ruxsat etilgan mahsulotlar bundan mustasno);
• retsept asosida beriladigan dori vositalarida referent narxlar mavjud bo‘lmasa yoki belgilanganidan oshib ketgan bo‘lsa;
• majburiy raqamli markirovka talab etiladigan mahsulot belgilangan tartibda markirovka qilinmagan bo‘lsa;

– ikkinchidan, ma’muriy jarayonlarning muddati uzaytirildi. Endi sertifikat berish to‘g‘risidagi qaror ikki ish kuni ichida qabul qilinadi (ilgari — bir kun edi). Muvofiqlik sertifikati esa qaror qabul qilinganidan so‘ng to‘lov to‘liq amalga oshirilgan sharti bilan uch ish kuni ichida rasmiylashtiriladi (ilgari — to‘lovga bog‘liq bo‘lmagan ikki kun);

– uchinchidan, muvofiqlik sertifikatini bekor qilish asoslari kengaytirildi. Xususan, endilikda sertifikat quyidagi hollarda bekor qilinishi mumkin:
• mahsulot iste’molchilar hayoti yoki sog‘lig‘iga tahdid tug‘dirsa;
• inspeksiya nazorati natijalariga ko‘ra nomuvofiqliklar aniqlansa;
• mahsulot tarkibi yoki ishlab chiqarish texnologiyasi xabarnomasiz o‘zgartirilgan bo‘lsa;
• ariza beruvchi tashkilot tugatilgan bo‘lsa;
• mahsulot ariza beruvchi tashabbusi bilan qaytarib olingan bo‘lsa;
• normativ hujjatlar o‘zgartirilgan yoki bekor qilingan bo‘lsa;
• nazorat qiluvchi organ tomonidan taqdimnoma kelib tushgan bo‘lsa.