«Реал» қаторасига тўртинчи ўйинда дуранг қайд этди

Мадриднинг «Реал» жамоаси ғалабасиз сериясини давом эттирди. Зайнидин Зидан шогирдлари Примеранинг навбатдаги турида ҳам ғалабага эриша олмади. Бунгача жамоа чемпионатнинг аввалги турларида «Вильярреал» (1:1) ва «Лас-Пальмас» (2:2) жамоалари билан дуранг қайд этган, ўтган ҳафтада ЕЧЛнинг гуруҳ босқичи 2-тури доирасида Дортмунднинг «Боруссия» жамоасига қарши кечган баҳс 2:2 ҳисобида якунланганди.

Испания чемпионатининг 7-турида «Эйбар»ни қабул қилган «Реал» яна муваффақиятсизликка учради. Меҳмонлар жамоаси «қироллик клуби»га жанг таклиф қилди ва уйга очко билан қайтди. Ўйиннинг 6-дақиқасида Фран Рикоенинг пасини голга айлантирган Андера Капа «Эйбар»ни олға бошлади. 11 дақиқа ўтиб эса Гарет Бэйл Криштиану Роналду узатган тўпни дарвоза тўрига йўллаб, ҳисобни тенглаштирди — 1:1.

Ўйиннинг қолган вақтида ҳисоб ўзгармади.

Қайд этиш керакки, Зидан бу ўйинда жамоанинг етакчи футболчилари Лука Модрич, Марсело ва Каземиро хизматларидан фойдалана олмади. Бу футболчилар жароҳат туфайли турли муддатларга сафдан чиққан.

7 турдан кейин «Реал» Испания чемпионати турнир жадвалида 2-ўринда, «Эйбар» 8-поғонада жойлашган.

Реал Мадрид – Эйбар 1:1
Голлар: 0:1 – 6 Рико, 1:1 – 17 Бэйл.
Реал Мадрид – Навас, Варан (Начо, 46), Данило, Карвахаль, Пепе, Иско (Асенсио, 72), Кроос, Ковачич, Бэйл, Роналду, Бензема (Мората, 46).
Эйбар – Риесго, дос Сантос, Луна, Капа, Лежен, Дани Гарсия, Эскаланте, Леон, Рико, Пенья (Бебе, 87), Энрик (Кике, 76).
Огоҳлантиришлар: Эскаланте (29), Карвахаль (44), Бэйл (44), Дани Гарсия (48), Мората (56), Лежен (57), Пенья (71), Кроос (73), Рико (84).