Акром Раҳмонқулов ишдан олинди. Жиззахда қурилиш соҳасидаги можаролар ортидан президент уни сиёсатга хиёнатда айблаганди

Жиззах вилояти «замҳокими» Акром Раҳмонқуловнинг қариндошлари ижтимоий ва бошқа соҳа объектларини қуриш бўйича бир неча юз миллиард сўмлик давлат буюртмаларини қўлга киритгани, унинг ўзи қариндошлари ютган тендерларда комиссия раҳбари сифатида қатнашгани маълум бўлганди.

Фото: Жиззах вилояти ҳокимлиги

Жиззах вилояти ҳокимининг саноатни ривожлантириш, капитал қурилиш, коммуникациялар ва коммунал хўжалик масалалари бўйича ўринбосари Акром Раҳмонқулов лавозимидан озод қилинди.

Вилоят ҳокимлиги матбуот хизмати хабар қилишича, бугун Халқ депутатлари Жиззах вилоят Кенгашининг навбатдан ташқари сессиясида Баҳром Амонович Назаров Жиззах вилояти ҳокимининг саноатни ривожлантириш, капитал қурилиш, коммуникациялар ва коммунал хўжалик масалалари бўйича ўринбосари лавозимига тасдиқланган.

Баҳром Назаров бунгача Қурилиш вазирлиги Пудрат ва махсус монтаж ишлари бозорини мувофиқлаштириш бошқармаси бошлиғи лавозимида ишлаб келаётганди.

Маълумот учун, Акром Баҳритдинович Раҳмонқулов 2017 йилга қадар Жиззах вилояти ҳокимининг саноатни ривожлантириш, капитал қурилиш ва коммунал хўжалик масалалари бўйича ўринбосари лавозимида ишлаган, 2017-2018 йилларда Жиззах шаҳри ҳокими бўлган, 2018 йил апрелидан буён яна вилоят ҳокими ўринбосари лавозимида ишлай бошлаганди.

2020 йил декабрида Davletovuz Telegram-канали муаллифи «Жиззахча тендерлар-2, оилавий пудрат, бир неча юз миллиардлик давлат буюртмалари» сарлавҳали суриштирувини эълон қилиб, унда вилоят «замҳокими» Акром Раҳмонқуловнинг қариндошларига тегишли бўлган хусусий компаниялар давлат буюртмаларини ўзаро «тақсимлаб олгани», бу давлат буюртмалари қиймати бир неча юз миллиард сўмни ташкил қилиши ҳақида ёзганди. Блогер бу масалага назорат органлари текширув ўтказиш орқали аниқлик киритиши мумкинлигини қўшимча қилганди.

«Жиззахча тендер-2». Жиззах вилояти «замҳоким»ининг қариндошлари бир неча юз миллиардлик давлат буюртмаларини қўлга киритгани маълум бўлди

Кейинроқ, 2021 йилнинг 10 январида Жиззах шаҳрида қурилаётган кўп қаватли бинолардан бири қулаб тушгач, бу масала яна кун тартибига чиқди. 15 январ куни президент Шавкат Мирзиёев Юнусобод тумани фаоллари иштирокида кечган йиғилишда Жиззахдаги уй қурилишига йўл қўйганлар қонун олдида жавоб беришлари кераклигини айтганди ва Жиззах вилояти ҳокимининг қурилиш бўйича ўринбосари ҳозирги сиёсатга хиёнат қилганини таъкидлаганди.

«Унинг бутун тўдасига қонуний жазо белгиланиши керак. Шоли курмаксиз бўлмаганидек, барибир эски замонни қўмсаган ноинсофлар ҳам бор. Улар эркинлик, очиқлик сиёсатини тушунмайди», деганди Шавкат Мирзиёев.

Бундан аввалроқ 2018 йил апрелидан буён Жиззах шаҳрига ҳокимлик қилиб келган Акбар Шукуров ишдан олиниб, унинг ўрнини Мирзачўл тумани собиқ ҳокими Комил Холмуродов эгаллагани хабар қилинганди.

#Жиззах #тайинлов #Акром Раҳмонқулов #Баҳром Назаров #давлат харидлари