Фарғонада эҳсон қутисини ўғирлаб кетганлар қўлга олинди

Эҳсон қутиси ичида 80 минг сўм бўлган. Бу гуруҳ олдинроқ бошқа ҳудудлардаги масжидлардан ҳам эҳсон қутиларини ўғирлаш билан шуғулланган.

Фото: Фарғона вилояти ИИБ ахборот хизмати

Ижтимоий тармоқларда 20 ноябр куни тунги соат 02:12 ларда Фарғона вилояти Қўштепа туманидаги «Сармазор» жоме масжидига Damas’да номаълум шахслар келиб, эҳсон қутисини олиб кетганлиги акс этган видео тарқалган эди.

Фарғона вилояти ИИБ ахборот хизмати ушбу шахслар қўлга олингани, улар олдинроқ бошқа масжидлардан ҳам эҳсон қутиларини ўғирлаш билан шуғуллангани ҳақида хабар берган.

«Ўтказилган терговга қадар текширув ҳаракатлари давомида Э.Н., Б.B. ҳамда С.А. бирга Олтиариқ туманидаги жоме масжидларидан ҳам эҳсон қутиларини ўғирлаганликлари аниқланган», — дейилади вилоят ИИБ ахборотида.

ИИБдагилар «Дарё» нашрига берган хабарга кўра, Қўштепада олиб кетилган эҳсон қутиси ичида 80 минг сўм бўлган.

Қўшимча қилинишича, ҳозирда улардан қўлқоп ва ниқоблар далилий ашё тариқасида олиниб, терговга қадар текширув ҳаракатлари давом эттирилмоқда.

#Фарғона вилояти #Олтиариқ тумани #Қўштепа тумани #эҳсон қутиси