Кличко Россияга ҳудудий ён босиш бўйича референдум ўтказилишини истисно этмади

Италиянинг Corriere della Sera газетаси Киев мэри Виталий Кличко билан интервюни чоп этди. Ушбу интервюда Кличко яқин орада Украинада тинчликка эришиш учун Россия Федерацияси билан ҳудудий муросага келиш бўйича мамлакат президенти Володимир Зеленский ташаббуси орқали референдум ўтказилишини истисно этмади. 

«Яқин ойлар Зеленский учун жуда қийин бўлади. У кўпроқ ўлим ва ҳалокат билан урушни давом эттириши керакми ёки Путин билан ҳудудий муросага келиш имкониятини кўриб чиқиши керакми? Минглаб қаҳрамон аскарларимизнинг ҳаётига зомин бўлган ҳудудимизнинг бир қисмидан воз кечишимиз керакми?» - деди Киев мэри. 

«У қандай қадам ташламасин, бизнинг президентимиз сиёсий муваффақиятсизликка эришиши хавфи бор, - деб давом этди Кличко. - Очиғини айтайлик: урушда ғалаба қозонишимиз керак, аммо вазият тобора қийинлашмоқда, бу иттифоқчиларнинг ёрдамига боғлиқ. Зеленский референдум ўтказишга тўғри келса, менимча, у ўз-ўзидан, халқсиз бундай оғриқли ва муҳим келишувларга эриша олмайди».

«Зеленский марказлашган ҳокимиятдан воз кечишга тайёр эканига ишончим комил эмас» 

Виталий Кличконинг сўзларига кўра, Володимир Зеленский учун миллий ишонч ҳукуматини яратиш ҳам ечим бўлиши мумкин. Мисол тариқасида у 7 октябр куни ҲАМАС гуруҳи томонидан мамлакатга уюштирилган ҳужумдан кейин бош вазир Бинямин Нетаняҳу томонидан тузилган Исроил ҳарбий кабинетини келтирди. «Бироқ, мен у (Володимир Зеленский) ўз қўлидаги марказлашган ҳокимиятдан воз кечишга тайёрлигига ишончим комил эмас», — дея қўшимча қилди Киев мэри. 

Шу билан бирга, у Украинада президентлик сайловларини уруш тугашидан олдин ўтказишга қарши чиқди ва «бу фақат Путиннинг фойдасига ишлайди», деди. Сайловлар «Украинани бўлиб ташлайди ва уни ҳар қандай йўл билан йўқ қилишга уринаётган душман қаршисида заифлаштиради», деб таъкидлади Кличко. 

Янги тинчлик конференцияси, Путин ва АҚШ сайловлари 

Шу билан бирга, Украина пойтахти мэри Зеленский Россия Федерацияси иштирокида ўтказмоқчи бўлган иккинчи Украинада халқаро тинчлик саммити истиқболларига шубҳа билан қаради: «Россияликларга тинчлик имкониятлари ҳақида гапириб бўлмайди, улар ҳар доим ўз ваъдаларини бузади. Путин Киевни қўлга киритишга ҳали ҳам умид қиляпти. Аммо Америка сайловларигача аниқ ҳеч нарса бўлмайди. Қўшма Штатлар Москва билан келишувларни кафолатлаши керак бўлган фундаментал ҳамкордир ва ҳаммаси Вашингтонда кейинги президент ким бўлишига боғлиқ».

Доналд Трампнинг АҚШдаги кузги президентлик сайловларида ғалаба қозонишидан хавотирдами, деган саволга Кличко шундай жавоб берди: «Агар у сайланса, биз у билан ишлашга мажбур бўламиз. Аммо шошилиш керак эмас, чунки ҳозир сайловолди кампаниясининг туманлари ичидамиз. Президентликка номзодлар овоз беришдан олдин айтганлари, шу жумладан, Украина бўйича баёнотлар сайловдан кейин эса бутунлай бошқача бўлади. Вашингтон Россия диктатураси Ғарб демократик жамиятлари учун хавф туғдиришини яхши билади».