Озода Нурсаидованинг клипини суратга олишда актриса қизни автомобил босиб кетди

2024 йилнинг 7 ноябр куни хонанда Озода Нурсаидованинг «Дилбарим» қўшиғи учун клип суратга олиш жараёнида бахтсиз ҳодиса юз бериб, актриса Сабрина Жабборовани автомобил босиб кетган. Бу ҳақда актрисанинг ўзи ижтимоий тармоқларда маълум қилган.

Сабринанинг сўзларига кўра, Mercedes-Benz G-класс (“Гелендваген”) бошқарувида вояга етмаган бошқа актриса С.М. бўлган. У ҳам клипда суратга тушаётган бўлган.

«Вояга етмаган актриса оператор ва режиссёр Ш.М.нинг кўрсатмаси билан газ педалини босган, бироқ ўша пайтда машина бошқарувини йўқотган. Машинанинг ғилдираклари Сабрина устидан икки марта ўтиб кетди: олдинги ғилдираги бутунлай унинг устидан ўтган, орқа ғилдираги эса қизнинг устида айланиб кетган. Воқеа натижасида Сабринанинг тос суяги синган, бошқа аъзолари оғир жароҳат олган», – дейилади Жабборованинг Instagram'даги саҳифасида қолдирилган маълумотда.

Жабрланувчига биринчи ёрдам вақтида кўрсатилмагани натижасида кўп қон йўқотган. Кейин уни 4-сонли касалхонага олиб боришган, 9 соатлик операциядан сўнг беморнинг ҳаёти сақлаб қолинган. Бироқ, жарроҳлик амалиёти нотўғри бажарилгани натижасида, унинг чап оёғи ўнг оёғидан 7 см узунроқ бўлиб, қиз ногирон бўлиб қолган.

Айни вақтда, шифокорлар қизнинг саломатлигини тиклаш учун унинг тос суягини синдириб, суякларни тўғрилаш кераклиги, бундай операциялар жуда камдан кам ҳолатларда мувафаққиятли ўтишини айтган.

Сабрина ёрдам сўраб қилган мурожаатида машина рулидаги вояга етмаган қизни «суратга олиш жараёнига А.Қ. олиб келгани ва унга ҳайдашга рухсат бергани»ни ёзиб қолдирган.

Унинг сўзларига кўра, суратга олиш ташкилотчилари ва бошқа айбдор шахслар жабрланувчига етарлича ёрдам кўрсатмаган. Фақатгина 4 ой давомида «филмни суратга олишда техник қоидаларни бузганлиги» учун жарима сифатида 500 доллар тўлаб турган.

«Жабрланувчининг онаси Сабринанинг оёққа туришига ёрдам сўраганида, у фақат қуруқ ваъдалар ва таҳдидларни олган. Унга воқеа бўйича материаллар интернетда тарқатилса, жабрланувчига ёрдам бутунлай тўхтатилиши айтилган», дейилади мурожаатда.

Маълум бўлишича, ушбу ҳодиса бўйича иш судга оширилган, лекин ҳали суд жараёни бошланмаган. Сабрина терговчи унга иш материалларини тақдим қилмаганини айтган.

Шунингдек, Сабрина нормал юриш қобилиятини тиклаш учун чет элда такрорий операция ўтказиши кераклигини айтган ва жамоатчиликдан ёрдам сўраган.

Маданият вазирлиги матбуот хизмати Kun.uz сўровига жавобан бахтсиз ҳодиса фактини инкор қилмади, аммо қўшимча тафсилотларни очиқламади.