Германиянинг янги ташқи ишлар вазири Болтиқбўйида хавфсизликни мустаҳкамлаш ниятида

Германия ташқи ишлар вазири Йоханн Вадефул Болтиқ денгизида сўнгги пайтларда содир этилган қўпорувчилик ҳаракатлари ортидан минтақада хавфсизликни кучайтирмоқчи. «Менимча, бутун Болтиқбўйи минтақаси шу пайтгача жамоатчилик томонидан жуда кам эътиборга олинди ва ваколатим давомида мен бунга кўпроқ эътибор қаратмоқчиман», деди у 10 май, шанбага ўтар кечаси чоп этилган Neue Osnabrücker Zeitung газетасига берган интервьюсида.

«Вазият беқарор, бу кўриниб турибди», — дея вазирнинг сўзларини келтиради журналистлар. Вадефул, шунингдек, Болтиқбўйи ва Скандинавия давлатлари ўртасидаги алоқа кабелларига зарар етказилгани, Россия-Эстония чегарасидаги чегара буянчларининг олиб ташланиши, Европа Иттифоқи ва НАТО давлатлари ҳаво ҳудудининг бузилиши ва Россия Ҳарбий-денгиз кучларининг хатти-ҳаракатлари ҳақида ҳам тўхталиб ўтди. «Шундай қилиб, биз хавф зонасида яшаётганимиз кўриниб турибди», — дея хулоса қилди сиёсатчи.

Худди шу интервьюда Йоханн Вадефул Украинанинг ҳам Европа Иттифоқига, ҳам НАТОга қўшилиш истиқболи борлигини таъкидлади. «НАТОда биз биргаликда Украина мудофаа иттифоқига қўшилиш йўлида эканлиги ва бу йўлни қайтариб бўлмайди, деган фикрга келдик», — дея таъкидлади у.

Шу билан бирга, вазир Германиянинг янги канцлери Фридрих Мерц сайланишидан олдин уруш тугагандан кейингина Украинанинг НАТОга аъзо бўлиш имконияти ҳақида гапирганини эслатди.