Украина Ўзбекистоннинг учта компаниясига санкциялар киритди

Санкциялар рўйхатидан «Mercury Renaissance» ва унинг таркибига кирувчи «Фарғона кимё заводи» ҳамда «Raw Materials Cellulose» МЧЖ жой олган. Шунингдек, Ўзбекистон ва Россия фуқаролигига эга экани таъкидланаётган Рустам Мўминовга нисбатан ҳам чекловлар киритилди.

Фото: fergchem.com

Украина ҳукумати Россия, Хитой, Эрон, Беларус ва Ўзбекистонда рўйхатдан ўтган бир нечта компанияларга нисбатан санкциялар жорий қилди. Бу президент Володимир Зеленский томонидан имзоланган фармонда кўзда тутилган.

Умумий рўйхатда 67 та Россия компанияси билан бир қаторда 7 та хорижий юридик шахс ҳам мавжуд бўлиб, уларнинг 3 таси Ўзбекистонда фаолият юритади. Шунингдек, санкциялар рўйхатига Ўзбекистоннинг 1 нафар фуқароси ҳам киритилган.

Санкцияга учраган компаниялардан бири «Mercury Renaissance» МЧЖ. Корхона 2016 йилда Тошкент шаҳрида давлат рўйхатидан ўтган. Фаолият тури – қурилиш техникаси ва ускуналарини ижарага бериш ҳамда лизинг хизматлари. Таъсисчилари Мўминов Рустам Раҳимжанович (60 фоиз) ва Тожиев Шаҳриёр Саҳиёрович (40 фоиз).

Иккинчи компания –«Raw Materials Cellulose» МЧЖ Жиззах вилоятида жойлашган бўлиб, қоғоз массаси ва целлюлоза ишлаб чиқаришга ихтисослашган. Таъсисчилари Уткина Лариса Михайловна (76 фоиз) ва Бикова Лариса Раҳимжонова (24 фоиз).

Учинчи компания – целлюлоза ишлаб чиқариш билан шуғулланадиган «Фарғона кимё заводи» МЧЖ. Мазкур корхона «Mercury Renaissance» таркибига киради.

Шунингдек, Украина ҳукумати бир вақтнинг ўзида Ўзбекистон ва Россия фуқаролигига эга эканлиги таъкидланаётган Рустам Мўминовга нисбатан чекловлар киритган.

Санкциялар 10 йил муддатга жорий этилган бўлиб, Украина ҳудудидаги активларни музлатиш, лицензияларни бекор қилиш, савдо келишувлари, маданий алмашинувлар, илмий соҳадаги ҳамкорликни тўхтатишни назарда тутади.

#Украина #санкция #Фарғона кимё заводи