ЕИ Россия нефти нархини 50 долларгача туширишни таклиф қилмоқда

20-22 май кунлари Канадада бўлиб ўтадиган G7 молия вазирларининг йиғилишида Европа Иттифоқи денгиз орқали ташиладиган Россия нефтининг максимал харид нархини пасайтиришни таклиф қилади. Бу ҳақда 19 май, душанба куни Европанинг иқтисодий масалалар бўйича комиссари Валдис Домбровскис маълум қилди, дея хабар беради Reuters. Унинг сўзларига кўра, ЕИ комиссияси бу масалани Россияга Украинага ҳарбий интервенцияси учун жорий қилинган иқтисодий санкцияларнинг янги пакетини муҳокама қилиш чоғида кўтарган. Домбровскис Европа Иттифоқи «нархлар шифтини» қай даражада пасайтирмоқчи эканлигига аниқлик киритмади, бироқ мунозаралардан хабардор бўлган Европа Иттифоқининг номи ошкор этилмаган расмийлари Reuters агентлигига бир баррель учун 50 доллар ишлаб чиқилаётганини айтишди. Ҳозирда Россиядан бир баррель нефть учун «нарх шифти» 60 долларни ташкил этади.

Европа Иттифоқи ҳозирда Украинадаги тажовузкорлиги учун Москвага қарши бир вақтнинг ўзида «энг катта» санкциялар режимини қўллашни тайёрламоқда, бу 20 май куни ЕИ Ташқи ишлар кенгаши йиғилишида эълон қилинади. Канадада навбатдаги, 17-жазо чоралари тўплами қабул қилинади. Унинг доирасида санкциялар рўйхатига 75 та янги юридик ва жисмоний шахслар, шунингдек, амалдаги эмбаргони четлаб ўтиб, Россия нефть ва нефть маҳсулотларини хорижий байроқлар остида ташийдиган «соядаги флот»нинг 200 та кемаси қўшилади. Бу Европа Иттифоқининг санкциялар рўйхатидаги шахслар сонини 2500 дан, кемалар сонини эса 300 дан оширади.

Гибрид фаолият учун Европа Иттифоқининг санкциялар режими доирасида Россия Федерациясида 27 жисмоний ва юридик шахсларга нисбатан тармоқ чоралари, шунингдек, индивидуал санкциялар жорий этилади. Европа Иттифоқининг инсон ҳуқуқларини бузганлик учун глобал санкция режими доирасида Россиядан яна 28 жисмоний ва юридик шахс санкциялар рўйхатига киритилади. Бундан ташқари, кимёвий қурол қўллагани учун Россияга қарши санкциялар жорий этиш режалаштирилмоқда. Гап оммавий тартибсизликларни бостиришнинг кимёвий воситалари ҳақида кетмоқда, Москва ундан Украинада уруш олиб бориш воситаси сифатида фойдаланмоқда, дейилади маълумотда.