АҚШ Федерал захира тизими собиқ ходими Хитой фойдасига жосуслик қилганликда айбланмоқда

The Wall Street Journal Хитой фойдасига жосусликда айбланаётган АҚШ Федерал захира тизими (ФЗТ) собиқ иқтисодчиси Жон Рожерсга оид иш тафсилотларини ўрганди.

Маълумотларга кўра, 2013 йилда Рожерс ФЗТ форумида иштирок этиш учун Шанхайга борган. Тергов версияси бўйича Хитой махсус хизматлари агентлари айнан шу ерда биринчи марта у билан алоқа ўрнатган.

Ўзини Хитой олий таълим муассасаларидан бирининг аспиранти деб таништирган шахс америкаликка ФЗТни ўрганаётгани ва унинг иши ҳақида кўпроқ маълумотга эга бўлмоқчи эканини айтган. Бир нечта учрашувдан кейин Рожерсга аспирант ҳисобидан Хитойга ташриф буюриш таклифи берилган. WSJ’нинг қайд этишича, бунинг оқибатида юзага келган воқеалар занжири 2021 йилда Рожерснинг ФЗТдан кетишига, жорий йил январда эса унга нисбатан жосуслик айблови эълон қилинишига олиб келган.

Терговчиларнинг маълум қилишича, Жон Рожерс хитойликларга ФЗТнинг ички ҳисоботларига оид маълумотларни, жумладан, Федерал захира тизимининг базавий ставкаси бўйича қарор қабул қиладиган қўмитасини бозор бўйича мажлисларига боғлиқ маълумотларни пул эвазига тақдим этиб келган. Федерал тергов бюроси агентларининг тинтуви натижасида ФЗТ собиқ ходимининг Вашингтондаги квартирасидан 50 минг долларга яқин пул топилган. Айбланувчининг аёли бу пуллар унга тегишли эканини таъкидламоқда, Рожерснинг ўзи эса жосуслик борасидаги айбловларни рад этяпти.

ФЗТ собиқ иқтисодчисининг адвокатлари ҳукуматнинг кўплаб айловлари етарлича асосга эга эмаслигини билдирган. Таъкидланишича, Рожерсда пул-кредит сиёсатига таъсир кўрсатадиган ФЗТнинг махфий маълумотларидан фойдаланиш учун рухсат бўлмаган. Собиқ ходимга нисбатан суд иши жорий йилда бошланиши керак. Агар Рожерс иқтисодий жосусликда айбдор деб топилса, у 15 йилгача озодликдан маҳрум этилиши мумкин.