Гуржистонда мухолифат етакчиси Ника Мелия қўлга олинди

Гуржистонлик мухолифатчи, «Ахали» партияси ва «Ўзгариш учун» коалицияси етакчиларидан бири Ника (Никанор) Мелия Тбилисида қўлга олинди. Бу ҳақда 29 май, пайшанба куни кечқурун унинг шериклари хабар берди. Уларга кўра, сиёсатчи подкаст ёзиб олиш учун йўлга чиққанида қўлга олинган.

Кейинроқ воқеани Гуржистон Ички ишлар вазирлиги тасдиқлади. У ерда айтилишича, Мелия хизмат вазифасини бажараётган ҳуқуқни муҳофаза қилувчи орган ходимини ҳақорат қилгани учун маъмурий модда бўйича қўлга олинган.

Айни пайтда Ника Мелия ҳам Гуржистон собиқ президенти Михаил Саакашвилининг бошқарувини тергов қилувчи парламент комиссиясига кўрсатма беришдан бош тортгани учун тергов остида. Мамлакатда бунинг учун жарима ёки бир йилгача қамоқ жазоси назарда тутилган.

Апрел ойи охирида суд сиёсатчини эҳтиёт чораси сифатида 50 000 лари (тахминан 16 100 евро) гаров эвазига озод қилди. Мелия принципиал равишда бу пулни тўламаслигини айтди, чунки у на парламент комиссиясини, на Гуржистон парламентининг барча таркибини қонуний деб ҳисобламайди. Бундан ташқари, у эҳтиёт чорасини ўзгартириш бўйича суд мажлисига ўзи келмаслигини айтди.