АҚШ Россияга янги санкциялар билан таҳдид қилди

Россиянинг БМТдаги доимий вакили йиғилишда сўзга чиқиб, Ғарбни «Россия агрессияси» ҳақидаги позицияни илгари сураётганликда айблади.

Фото: AP

АҚШнинг БМТдаги доимий вакили вазифасини бажарувчи Жон Келли Москвани музокаралардан бош тортса, қўшимча санкциялар қўлланиши мумкинлигидан огоҳлантирди.

БМТ Хавфсизлик кенгашининг Украинадаги вазиятга бағишланган йиғилишида Келли Вашингтон Киев ва Москва ўртасида тинчлик ўрнатишга интилаётганини таъкидлади. Унинг сўзларига кўра, Украина муросага тайёр бўлишига қарамай, Россия ўт очишни тўхтатишдан қочишда давом этмоқда.

«Агар Россия урушни давом эттиришга қарор қилса, Қўшма Штатлар музокаралардан воз кечишга мажбур бўлади. Бу можаронинг ҳарбий ечими йўқ. Ҳозир таклиф қилинаётган келишув Россия учун мумкин бўлган энг яхши натижадир. Президент (Владимир) Путин буни қабул қилиши керак. Урушни давом эттириш ҳеч бир томоннинг манфаатларига мос келмайди», — деди америкалик дипломат.

Келли, шунингдек, Вашингтон Россия билан тинч келишув ва иқтисодий ҳамкорлик қилишдан манфаатдор эканини, бироқ бу йўлдан воз кечиш Москвага янги санкциялар билан таҳдид қилишини таъкидлади.

«Ушбу урушни тугатиш учун масъулият ҳам Россия, ҳам Украина зиммасига тушади. Вақт можарони узайтирмоқчи бўлганлар томонида эмас. Биз иккала томонни тинчлик фойдасига қийин, аммо тарихий қарор қабул қилишга чақирамиз», — дея қўшимча қилди у.

#АҚШ #санкция #Россия