Тошкентда савдо дўкони томига чиққан 11 ёшли қиз ток уриши оқибатида вафот этди

У томга укасининг ўйинчоғини олиб тушиш мақсадида нарвон орқали чиққан. Қайтиб тушаётган вақтида том қисмига яқин жойдан ўтган электр тармоғини ушлаб олган ва ток уриши оқибатида воқеа жойида вафот этган. Ҳолат юзасидан жиноят иши қўзғатилди.

Фото: Тошкент шаҳар ИИББ матбуот хизмати

Ижтимоий тармоқларда 11 ёшли қизнинг ток уриши оқибатида вафот этгани ҳақидаги хабарлар тарқалди. Тошкент шаҳар ИИББ матбуот хизмати ҳолат юзасидан расмий маълумот берди.

Бошқарма маълумотида келтирилишича, ҳодиса жорий йилнинг 30 май куни тахминан соат 18.00 да содир бўлган. 2014 йилда туғилган Н.А. Миробод тумани Амир Темур кўчасидаги савдо дўконлардан бирининг том қисмига укасининг ўйинчоғини олиб тушиш учун нарвон ёрдамида чиққан.

Қиз ўйинчоқни олиб, қайтиб тушаётган вақтида том қисмига яқин жойдан ўтувчи электр тармоғини ушлаб олган. Бунинг оқибатида у ток уриб, воқеа жойида вафот этган.

Ҳолат юзасидан Миробод туман ИИО ФМБ ҳузуридаги Тергов бўлими томонидан Жиноят кодексининг 257-моддаси 2-қисми “а” банди (Меҳнатни муҳофаза қилиш қоидаларини бузиш одам ўлишига сабаб бўлиши) билан жиноят иши қўзғатилган. Ҳозирда тергов ҳаракатлари давом этмоқда.

Аввалроқ Бухородаги хусусий боғчада икки яшар бола ток уришидан вафот этганди.

#Тошкент #ток уриши #савдо дўкони