Трамп Путинга нисбатан риторикасини кескинлаштирмоқда, Кремл бунга «босиқлик» билан қарамоқда

АҚШ президенти Доналд Трамп Россия президенти Владимир Путин манзилига яна бир бор танқидли сўзлар айтди.

Журналистлар билан суҳбат асносида Трамп навбатдаги марта Россия-Украина урушида ҳар куни бир неча минг киши ҳалок бўлаётганини таъкидлаб, буни тўхтатиш лозимлигини қайд этди – шу билан бирга, АҚШ президенти бунинг учун Путин томонидан ҳеч қандай иш қилинмаётганидан шикоят қилди. «Биз Путиндан фақат беҳуда гапларни эшитяпмиз. У доимо жуда хушмуомала, аммо охир-оқибат бундан ҳеч қандай фойда бўлмаяпти», – деди Трамп ва Россия президентидан «норозилиги»ни қўшимча қилди.

Трамп Россия билан савдо қилувчи ва шу билан бирга Украинага ёрдам бермайдиган мамлакатларнинг барча маҳсулотларига 500 фоиз миқдорида Америка божларини жорий этишни назарда тутадиган янги қатъий санкциялар тўғрисидаги қонун лойиҳасига ҳам «жуда жиддий» ёндашаётганини қайд этган. АҚШ Сенати қонун лойиҳасини кўриб чиқишни 9 июл куниёқ кўриб чиқишни бошлаши кутилмоқда, 100 сенатордан 80 нафари ҳужжатни қўллаб-қувватлашга тайёрлигини билдирган. Бир ойча олдин ОАВ Оқ уй қонун лойиҳаси муаллифларидан формулировкани юмшатишни талаб қилгани ҳақида ёзганди, аммо июн ойи охирида ҳужжат ташаббускори Линдси Грэм Трамп қонун лойиҳасини қабул қилиш масаласида «олдинга силжиш» заруратини кўраётганини айтди.

Трамп бир неча кун олдин ҳам Путинни кескин тарзда танқид қилганди – бу уларнинг сўнгги телефон суҳбатидан кўп ўтмай содир бўлганди. АҚШ президенти тинчлик музокараларида олдинга силжиш йўқлигидан «ҳафсаласи пир бўлгани»ни, чунки Путин «тўхташни истамаслиги ва бу жуда ёмонлиги» ҳақида гапирганди. Кремл маълумотига кўра, ўзаро телефон мулоқотида Трамп «ҳарбий ҳаракатларни тезроқ якунлаш» масаласини ўртага ташлаган, Путин эса, гарчи музокараларни давом эттиришга тайёрлигини билдирган бўлса-да, Россия «можаро сабабларини бартараф этиш мақсадларидан чекинмаслиги»ни таъкидлаган.

Россия президенти матбуот котиби Дмитрий Песков бугунги брифингда Кремл Трампнинг кескин риторикасига «хотиржам» муносабатда бўлаётганини айтиб ўтди. «Трамп, умуман олганда, қандай ибораларни ишлатиши ва ҳоказоларда етарлича кескин услубга эга», – деди Кремл вакили. У Москва Вашингтон билан мулоқот давом эттирилиши ва «анча бузилган икки томонлама муносабатларни тузатиш йўли»га умид қилаётганини айтган.

CNN телеканали 2024 йилда, АҚШдаги президентлик сайловларидан анча олдин Трамп кампаниясига хайрия йиғиш учун ўтказилган ёпиқ тадбирда ёзиб олинган аудиони тарқатди. Унда Трамп донорларга бир сафар (катта эҳтимол билан, ўзининг илк президентлик муддати даврини назарда тутган) Путинга агар Украинага бостириб кирадиган бўлса, «Москвага бомба ёғдириш» билан таҳдид қилгани ҳақида гапирган.

«Мен Путинга айтдим: „Агар сен Украинага кирадиган бўлсанг, мен Москвага бомба ёғдираман. Сенга айтаман – менда бошқа танлов йўқ“», – деган Трамп аудиода. Унинг сўзларига кўра, Путин бунга ишонмаслигини айтган. Шу билан бирга, Путин «10 фоизга» ишонганига Трампнинг ишончи комил. Худди шу сўзларидан кейин Трамп ХХР раиси Си Жинпинга ҳам агар Хитой Тайванга бостириб киргудек бўлса, АҚШ Пекинни бомбалаши ҳақида шундай огоҳлантириш бергани ҳақида гапирган.

Бу маълумотга ҳам Кремл ўта вазминлик билан муносабатда бўлди. Песков журналистларга изоҳ олиш учун Оқ уйга мурожаат қилишни таклиф қилди ва ёзув сохта бўлиши мумкинлигини таъкидлади. «Кўпинча фейклар ҳақиқий маълумотларга қараганда анча кўп бўлади ва биз ҳар доим у ёки бу янгиликларни таҳлил қилганда шунга асосланамиз», – деди Кремл вакили.