Аукционда сумка 10 млн долларга сотилди

Харидор япониялик хусусий коллекционер бўлган, унинг шахси ошкор этилмаган.

Бундан олдинги рекорд тимсоҳ терисидан ишланган ҳамда бриллиантлар қадалган Hermès Kelly сумкасига тегишли бўлиб, у 2021 йилда кимошди савдосида 513 минг долларга пулланганди.

Аукцион уй хабарида айтилишича, Birkin сумкаси 10 дақиқа давом этган савдода сотилган, унда тўққиз нафар харидор иштирок этган.

Энг кўп хоҳланадиган мода аксессуари

Қора чарм сумка 1985 йилда қўшиқчи ва актриса Жейн Биркин учун тайёрланганди, ўшанда у самолётда Hermès бошқарув раиси Жан-Луи Дюм билан ёнма-ён ўтирганида сумкасини тушириб юборган, унинг ичидаги буюмлари сочилиб кетганди. Жейн Биркин ўшанда қўшнисидан модалар уйи нега аёллар учун чўнтаклари қулайроқ бўлган каттароқ сумкалар ишлаб чиқармаслиги ҳақида сўрайди.

Жан-Луи Дюма кўп ўтмай актрисанинг хоҳишига мос келадиган аёллар сумкаси эскизини чизади.

Кейинроқ Hermès модалар уйи ушбу дизайндаги сумкаларни сотувга чиқаради ва бу аксессуар вақт ўтиб дунёдаги энг таниқли ва кўпчилик қўлга киритишни истайдиган ҳашаматли аксессуарлардан бирига айланади.

1994 йилда Жейн Биркин ОИТСга қарши курашувчи хайрия ташкилотига маблағ йиғиш учун ўз сумкасини аукционга қўяди.

Sotheby's аукцион уйи вакили Морган Ҳалими сумкага берилган нарх «афсонанинг ҳайратомуз кучи» ва унинг коллекционерларни ноёб тарихга эга нарсаларни сотиб олишга ундаш қобилиятини намойиш этишини таъкидлади.

«Birkin сумкалари прототипи – айнан шундай, буюк тарих бошланган нарса, бизга замонавий идолни берган нарса, Birkin сумкаси – дунёдаги энг орзу қилинадиган сумка», – деган Ҳалими.

Ҳозирда Birkin’нинг айрим моделлари ўн минглаб доллар туради. Бундай сумкалар эгалари қаторида – Кейт Мосс, Виктория Бекҳэм ва Женнифер Лопес каби машҳурлар бор.