АҚШ энергетика вазири: Россия нефтига қарши санкциялар «жуда реал»

АҚШ энергетика вазири Райтнинг сўзларига кўра, Россия нефт секторига қарши санкциялар Москвага Киев билан тинчлик битимини тузиш учун «энг катта босим» бўлади.

Крис Райт Фото: Aaron M. Sprecher/Bloomberg

Россиянинг Украинага қарши урушини тўхтатиш учун Россия нефт секторига қарши санкциялар жорий этиш «жуда реал имконият». Бу ҳақда АҚШ энергетика вазири Крис Райт 22 июл, сешанба куни Fox News телеканалида маълум қилди.

Аввалроқ АҚШ президенти Доналд Трамп Вашингтон Россия нефти харидорларига 100 фоизлик жазо божлари жорий этиши мумкинлиги билан таҳдид қилганди. Агар Москва Трамп томонидан Россияга ажратилган, сентябр ойи бошида тугайдиган 50 кунлик муддат охиригача Киев билан тинчлик келишувига рози бўлмаса, бу санкциялар кучга кириши мумкин.

«Бу Россияга катта босим», деди Крис Райт Fox News телеканалига берган интервюсида. «Бу уларга (руслар) бўлиши мумкин бўлган энг катта босим». Вазирнинг эслатишича, Қўшма Штатлар дунёдаги етакчи нефт ва газ қазиб олувчилардан бири бўлиб, бу уларга «илгари тасаввур қилиб бўлмайдиган» қадамлар қўйиш имконини беради.

21 июл оқшомида Украина президенти Володимир Зеленский Россия ва Украина ўртасида тинчлик ўрнатиш бўйича музокараларнинг навбатдаги раунди 23 июл куни Истанбулда ўтказилиши кераклигини маълум қилди. Украина раҳбарининг сўзларига кўра, бўлажак учрашувнинг асосий мавзулари ўт очишни тўхтатиш, яна бир асирлар алмашинуви ва Россияга ноқонуний олиб кетилган украиналик болаларни ватанига қайтариш бўлиши керак. Зеленский, шунингдек, музокаралар унинг Россия президенти Владимир Путин билан учрашувига тайёргарликни бошлашини айтди.

#санкция #Россия #нефт #Крис Райт