Немис сиёсатчиси сайлов бюллетенидаги свастика туфайли истеъфога чиқди

Баден-Вюртемберг ери парламенти спикери ўринбосари, Германия Социал-демократик партияси (ГСДП) вакили Даниэл Борн сайлов бюллетенига ўта ўнг «Германия учун муқобил» (ГуМ) партияси аъзоси исмининг ёнига свастика чизганини тан олиб, ўз лавозимини тарк этди. Борн 25 июл, жума куни берган баёнотида овоз бериш жараёнида «жиддий хато»га йўл қўйганини ёзган. Шунингдек, у Ландтагдаги ГСДП фракциясини тарк этиш ниятида.

Свастика тасвирланган бюллетен бир кун аввал Баден-Вюртемберг парламентида яширин овоз беришдан кейин топилган. Тақиқланган белги ўта ўнг «Германия учун муқобил» партияси номзоди Бернхард Айзенхутнинг исми ёнидаги «ҳа» бандида кўрсатилган, деб хабар берди dpa ахборот агентлиги. Ҳудуд парламенти спикери ва "яшиллар" партиясидан парламент аъзоси Муҳтерем Арас воқеани «парламент учун шармандалик» деб атади ва бундай хатти-ҳаракат уни «жирканч» қилганини айтди. У ГуМ парламент аъзоларига мурожаат қилиб, афтидан, ҳуқуқбузарлик ўнглар қанотидан бири томонидан содир этилганини билдирган.

Бироқ кейинроқ социал-демократ Борн жиноятни тан олди. «Мен Даниэл Борнни қизиққон парламент аъзоси сифатида биламан», деди Арас. «Шунга қарамай, мен унинг истеъфога чиқишини кутаман».

Айнан «Германия учун муқобил» фракцияси 24 июл куни Ландтагда яширин овоз беришни талаб қилди, бироқ партия бузилган сайлов бюллетенига алоқадорлигини қатъиян рад этишини ва воқеани қоралашини таъкидлади. Овоз бериш учун мажлислар залининг чиқиш жойларига иккита сайлов қутиси ўрнатилди — ГуМ ва ГСДП депутатлари хонанинг қарама-қарши томонида турди ва шунга мос равишда ўз бюллетенларини турли қутиларга ташлади.