Кремл Россия Трампнинг санкцияларидан қўрқмаслигини билдирмоқда

Россия президенти матбуот котиби Дмитрий Песков Россия иқтисодиёти уруш даврида аллақачон санкцияларга мослашганини айтиб ўтди. У АҚШ президенти Доналд Трампнинг Россиядан 10 кун ичида жанговар ҳаракатларни тўхтатишни талаб қилган ултиматумига шундай изоҳ берди.

«Биз анчадан буён кўплаб санкциялар остида яшаяпмиз ва иқтисодиётимиз жуда кўп чекловлар остида ишлаб келмоқда, шунинг учун, албатта, бизда бу борада маълум бир иммунитет аллақачон шаклланган», – деди Песков.

Москванинг ултиматумга реакцияси қандай бўлиши ҳақидаги тўғридан тўғри берилган саволга жавобан Песков Кремл «бу баёнотларнинг барчасини маълумот учун қабул қилиши»ни айтиш билан кифояланди. «Биз бу борада президент Трампдан, бошқа халқаро вакиллардан келаётган барча баёнотларни қайд этиб қўйишда давом этяпмиз», – дея қўшимча қилди у.

Трампнинг ултиматуми муддати қисқарганига ҳозирда Швейцарияда бўлиб турган Россия делегациясига раҳбарлик қилаётган Федерация кенгаши спикери Валентина Матвиенко ҳам изоҳ берди. Бу кенг кўламли уруш бошланганидан бери биринчи марта юқори даражадаги Россия делегацияси Европада бўлишидир.

Матвиенко Россия Федерацияси эмас, балки Украина «тинчликка эришиш бўйича жиддий ниятлардан воз кечаётгани»ни айтди ва «Украина томонига ултиматумлар юбориш»ни таклиф қилди, унинг фикрича, айнан улар тинчлик музокараларини бузмоқда.

Ўз навбатида, Россия Ташқи ишлар вазирлиги «таҳдидлар муносабатларни нормаллаштириш жараёнига ижобий таъсир кўрсата олмаслиги»ни қайд этди.

Трамп 29 июл куни Россия президенти Владимир Путинга ултиматум муддатини «бугундан бошлаб 10 кунга» қисқартиришини расман эълон қилди. Агар бу муддат ичида ҳарбий ҳаракатлар тўхтатилмаса, АҚШ президенти Россиядан нефт ва газ сотиб олувчи давлатлар учун 100 фоизлик божлар ва «бошқа чоралар» жорий этишга ваъда берди.

Шу билан бирга, Трампнинг ўзи янги санкциялар таъсир қилиш-қилмаслигини билмаслигини тан олди. «Бу Россияга таъсир қиладими ёки йўқми, билмайман, чунки у [Путин] урушни давом эттиришни хоҳлаётгани аниқ», - деди АҚШ президенти.

АҚШ Давлат департаменти Трампнинг янги ултиматуми ортидан қатъий санкциялар ҳақидаги гапларга «жиддий» муносабатда бўлиш кераклигини таъкидлади. Вазирлик матбуот котиби Тэмми Брюс Трамп «жиддий одамлиги»ни таъкидлаган. Унинг сўзларига кўра, шу пайтгача Трамп «сабр қилган» ва бу сабрни «баъзилар нотўғри тушунган».