Фронтдаги вазият: Покровск штурм қилинмоқда, Россия бутун Донбассни эгалламоқчи

Бир йил олдин, Украина қуролли кучлари Курск областига бостириб киришга тайёргарликни якунлаётганида, РФ қуролли кучлари Авдийивка ғарбидаги Прогресс қишлоғи атрофида украинлар мудофаасини ёриб ўтган ҳамда Покровск томон ҳаракатланганди. Бу юриш мақсади – шаҳарнинг ўзи эмас (шаҳар йўналишидаги манёвр чалғитувчи ҳаракат бўлиб чиқди), Донбасснинг жанубий қисми эди. Аммо Покровскнинг ўзи ҳам таҳдид остида турарди. Бугунги кунга келиб Россия армияси унинг чеккаларига етиб келган. Покровскка жанубдан РФ қуролли кучлари разведкачилари кирмоқда; шимолда эса шаҳарни бошқа бир гуруҳ айланиб ўтишга уринмоқда, унинг мақсади шаҳарни Донбасснинг шимолидан узиб қўйиш ҳисобланади. Ва Украина қуролли кучлари учун хавф шу билан тугамайди. Покровск шарқидаги мудофаа чизиғида юзага келган ўша бўшлиқ орқали РФ қуролли кучлари шимолга ҳам юриш қилмоқда. Катта эҳтимол билан, бу юришнинг асосий мақсади – Краматорск ва Словянск агломерациясига чиқиш ҳисобланади. Ушбу шаҳарларнинг эгалланиши Кремл учун катта сиёсий аҳамиятга эга: бу Донбасс устидан тўлиқ назорат ўрнатилганини эълон қилишга имкон беради. Бу вақтда Украина қуролли кучлари мамлакат шимоли-шарқида Суми областига бостириб кирган бўлинмаларни чегара ортига суриб ташлаш учун катта қўшин ушлаб туришга мажбур бўлмоқда.

Покровск ва Константиновка

Россия қўшинлари июл ойи ўрталарида Покровскдан шимоли-шарқдаги Новоэкономическое посёлкасининг бир қисмини эгаллаб, Покровскни шимолдаги Доброполе билан боғловчи йўл бўйида жойлашган Родинскийга яқинлашганди. Бу эса Покровск–Мирноград агломерациясини шимолдан ўраб олиш хавфини туғдиради. Агар Родинский ҳам эгалланса, Покровск Украинанинг асосий қисми билан фақат анча ғарбда жойлашган Днипро шаҳрига борувчи йўл орқали боғланади. Бундай коммуникация эса Покровск штурми бошланган тақдирда, шаҳар ҳимоясидаги қўшинларга таъминот етказиб бериш учун етарли бўлмаслиги мумкин.

РФ қуролли кучлари эса шаҳарни штурм қилишга тайёрланмоқда: шаҳар жанубий чеккасидаги назорат ҳудуди кенгайтирилмоқда ва шаҳар ичкарисига разведкачи гуруҳлар юборилмоқда. Бундан ташқари, украинлар баҳор давомида амалга оширган қарши ҳужумларга қарамай, РФ қуролли кучлари шаҳар ғарбидаги Котлино ва Удачное посёлкалари ҳудудида ташкил этилган плацдармни сақлаб қололди. Штурм бошланганида Россия қўшинлари шу ердан туриб Покровск–Днипро йўли йўналишида ҳужум қилиб, шаҳар тўлиқ қуршовга олиниши хавфини юзага келтириши мумкин.

Покровск ва Константиновка оралиғида Россия қўшинлари нафақат шаҳарларни айланиб ўтиш орқали юриш қилмоқда, балки шимолроқдаги Дружковка ва Доброполе йўналишларида ҳам ҳаракатланмоқда. Полтавканинг бир қисмини эгаллаган ва Владимировкага яқинлашган РФ қуролли кучлари Шахово яқинида Доброполе–Дружковка йўлига чиқишни кўзлаган. Катта эҳтимол билан, бу юришнинг якуний мақсади – Краматорскка чиқиш. Ҳозирги юриш суръати ҳисобга олинган ҳолда, бу йил охиригача рўй бериши даргумон.

Россия ҳужумининг яна бир йўналиши – Константиновка шаҳри. Тез орада унга уч томондан ҳужум қилишлари мумкин. Шаҳарга ғарбдан июл ойи охирида Яблоновкани эгаллаб олган ва Покровск–Бахмут шоссеси бўйлаб ҳужумларни давом эттираётган гуруҳ таҳдид солмоқда. Шарқдан Часив Яр ва Ступочкининг катта қисмини эгаллаб олган рус бўлинмалари босим ўтказмоқда. Жанубдан, Торецк томондан ўтган ҳафта Белая Горани ишғол қилган қўшинлар келмоқда.

Ушбу йўналишларнинг барчасига қарши чиқиш учун Украина қуролли қучларининг бу йўналишдаги кучлари ҳали етарли эмас.

Днипропетровск области чегараси

Украина қуролли кучлари Покровскдан жануброқда ҳам шахсий таркиб бўйича етишмовчиликка учраган. РФ қуролли кучлари Донбасснинг жанубий қисмида – Донецк, Запорижжя ва Днипропетровск областлари туташган нуқтада ҳужум қилмоқда. Ҳужумлар турли йўналишларда олиб борилмоқда: Велика Новосилкадан ғарбда Россиянинг «Восток» қўшинлар гуруҳи Темировка ва Малийивкани эгаллаган, аммо Украина қуролли кучлари бой берилган позицияларни қарши ҳужумлар орқали қайтариб олишга уринмоқда. Бу йўналишда бундай ҳолат олдин ҳам кузатилган, аммо бундай қарши ҳужумлар Россия юришини фақат вақтинча секинлаштира олган.

Велика Новосилкадан шимолроқда «Восток» гуруҳи бўлинмалари Зелений Гайни эгаллаб, Волчя дарёси бўйларига чиқишган. Украина қуролли кучлари дарёнинг шимолий соҳили бўйлаб янги мудофаа линияси яратишга ҳаракат қилмоқда. Аммо Россия армияси («Центр» гуруҳи) шимолий соҳилдаги Дачное қишлоҳи ҳудудида плацдармга эга. Катта эҳтимол билан, РФ қуролли кучлари кенг фронт бўйлаб Волчяни кечиб ўтишга ҳамда Днипропетровск областидаги Новопавловкага ҳужум уюштиришга ҳаракат қилади.

Суми фронти

Украина қуролли кучлари Россия қўшинини Суми областидан Курск томон қайтариб юборишга уринишдан тўхтамаяпти. Бунинг учун улар Кондратовка ва Алексийивка атрофида русларнинг ғарбий қанотига ҳужум қилмоқда. Украина армияси бу участкага зарбдор қисмларни ташлаш орқали иккала қишлоқни ҳам қисман эгаллашга муваффақ бўлган, аммо Россия авиацияси бу муваффақиятни ривожлантиришга тўсқинлик қилмоқда (эълон қилинаётган видеоларга кўра, руслар бу участкада ҳар куни ўнлаб бомба ишлатмоқда).

Украина қуролли кучлари фаоллашувига қарамай, РФ қуролли кучлари Суджа–Сума йўлининг ғарбий қанотида юриш қилишда давом этмоқда: улар Юнаковкада назорат ҳудудини кенгайтирган ва Яблоновкани эгаллаган.

Фронтнинг бошқа участкалари

Россия қўшинлари Запорижжя жанубидаги Каховка сув омбори қирғоғи яқинида локал операцияни давом эттирмоқда. Каменский қўлга киритилгандан сўнг улар Степногорск чеккасига яқинлашишга муваффақ бўлишди. Запорижжядан уларни тахминан 25 километр масофа ажратиб туради. Шаҳарга ҳужум қилиш учун Россия гуруҳида (ҳозирча) куч йўқ бўлса-да, янги позициялар келажакда каттароқ ҳужум учун бошланғич нуқта бўлиши мумкин. Бундан ташқари, ҳозирги ҳужумлар Украина қуролли кучлари қўмондонлигини Запорижжя яқинидаги танқис захираларни олиб келишга мажбур қилиши мумкин.

Харкив областида – Оскол дарёсининг ғарбий қирғоғидаги плацдармда – РФ қуролли кучлари Купянскнинг шимолий чеккасига етиб борди ва бир вақтнинг ўзида Купянск–Харкив йўлига ёриб киришга ҳаракат қилмоқда. Катта эҳтимол билан, операциянинг мақсади 2025 йилдаёқ Купянскни (ва Украина қуролли кучларининг Осколнинг шарқий қирғоғидаги йирик плацдармини) қўлга киритишдир.