Трамп ва Путиннинг эҳтимолий учрашуви. Бу ҳақда нималар маълум?

Чоршанба куни кечқурун, Америка президенти махсус вакили Стив Уиткофф Москвадан учиб кетиши биланоқ, ғарбдаги нашрлар ўз манбаларига таяниб кейинги ҳафтада Доналд Трамп ва Владимир Путиннинг ўзаро учрашуви, кейин эса Украина президенти Володимир Зеленский иштирокида учтомонлама учрашув ўтказилиши мумкинлиги ҳақида ёза бошлади.

Трамп музокаралар якунида аввалига Уиткофф Москвада Путин билан жуда самарали учрашув ўтказганини айтди, кейинроқ журналистлар билан мулоқот чоғида Украинадаги урушни тугатиш масаласини муҳокама қилиш учун яқин орада Россия раҳбари билан учрашиши мумкинлигини тасдиқлади.

BBC президентларнинг эҳтимолий учрашуви ҳақида нималар маълумлигини кўриб чиқди.

Икки томондан сигналлар

Уиткоффнинг Путин билан Кремлдаги бешинчи учрашуви, апрел ойи охиридаги сўнгги учрашувда бўлгани каби тахминан уч соатга яқин давом этган. Уиткофф Москвага Доналд Трампнинг Украинадаги сулҳ бўйича ултиматуми тугашига икки кун қолганида ташриф буюрди.

«Сезиларли ютуқларга эришилди! Шундан сўнг, баъзи европалик иттифоқчиларимизни хабардор қилдим. Ҳамма бу урушни тугатиш керак деган фикрга қўшилади ва биз яқин кунлар ва ҳафталарда бунинг устида ишлаймиз. Бу масалага эътиборингиз учун ташаккур!» – деб ёзди Трамп музокаралардан сўнг Truth Social ижтимоий тармоғида.

Путиннинг ёрдамчиси Юрий Ушаков учрашувдан сўнг «Украина инқирози» ҳамда «Россия ва АҚШ ўртасидаги стратегик ҳамкорликнинг эҳтимолий ривожланиш истиқболлари» ҳақида «жуда фойдали ва конструктив суҳбат бўлиб ўтгани»ни қайд этди.

Унинг сўзларига кўра, Россия томони Америка маъмуриятига «баъзи сигналлар»ни юборган ҳамда АҚШдан тегишли сигналларни олган, у ҳозирча батафсил изоҳ беришдан тийилишини қўшимча қилган.

Fox News телеканалининг Америка маъмурияти вакилига таяниб таъкидлашича, Уиткофф Москвадаги музокараларда Путиндан Доналд Трамп билан учрашишга тайёрлиги ва хоҳиши ҳақида сигнал олган.

«Владимир Путин бугун Москвада Стив Уиткоффга Трамп билан учрашмоқчи эканини айтди», – деди телеканал мухбири эфирда.

CNN телекомпанияси ҳам Оқ уйнинг икки вакилига таяниб Путиннинг ўзи Кремлда Уиткофф билан музокаралар чоғида Трамп билан учрашув ўтказишни таклиф қилганини хабар қилди.

ОАВ Оқ уйда Уиткоффнинг Путин билан мулоқоти «кутилганидан кўра самаралироқ» бўлгани ҳақида ёзган.

Трамп ва унинг маъмуриятидагилар Путин билан учрашув ҳақида нима дейишмоқда?

Чоршанба куни кечқурун журналистлар билан мулоқот чоғида Доналд Трамп Путин билан тез орада учрашиши мумкинлигини тасдиқлади.

«Учрашув яқин орада бўлиб ўтиши мумкинлиги яхши», – деди Трамп. У Россия ва АҚШ чоршанба куни «яхши музокаралар» ўтказгани ҳақидаги гапни такрорлади, шу билан бирга, Москванинг савдо ҳамкорларига қарши кейинги иккиламчи санкцияларни истисно қилмади.

Бироз олдин АҚШ давлат котиби Марко Рубио Россия ва АҚШ етакчиларининг эҳтимолий учрашуви йўлидаги «кўплаб тўсиқлар»ни енгиб ўтиш учун катта ишлар қилиниши кераклигини айтганди.

«Бугун яхши кун бўлди, лекин олдинда бизни кўп иш кутмоқда. Ҳали кўплаб тўсиқларни енгиб ўтиш керак ва биз буни яқин кунлар, соатлар, балки ҳафталар ичида амалга оширишга умид қиламиз», – деди Рубио Fox Business телеканалига.

Оқ уйдаги журналистлар учрашувга тайёргарлик кўрилаётганини тасдиқлаганди. Уларнинг маълумотига кўра, Трамп аввал Путин билан, кейин эса Украина президенти Володимир Зеленский иштирокида учтомонлама учрашувлар ўтказиши мумкин.

«Россияликлар президент Трамп билан учрашиш истагини билдиришди ва президент ҳам президент Путин, ҳам президент Зеленский билан учрашиш учун очиқ. Президент Трамп бу шафқатсиз уруш тугашини истайди», – дея Оқ уй матбуот котиби Кэролайн Ливиттнинг баёнотидан иқтибос келтиради CNN.

Логистик мураккабликлар

New York Times газетаси Трампнинг Украина ва Россия президентлари билан учрашувлар ўтказиш режаси унинг Европа етакчилари билан телефон орқали мулоқоти чоғида маълум бўлганини ёзган.

Суҳбатда Буюк Британия бош вазири Кир Стармер, Германия канцлери Фридрих Мерц, НАТО бош котиби Марк Рютте, АҚШ вице-президенти Жей Ди Вэнс, давлат котиби Марко Рубио, Стив Уиткофф, шунингдек, Володимир Зеленский иштирок этган.

Чоршанба куни кечқурун қилган мурожаатида Украина раҳбари Россия «энди ўт очишни тўхтатишга кўпроқ мойил кўринаётгани»ни айтди.

New York Times манбаларига кўра, учрашувлар – агар улар бўлиб ўтса – европалик ҳамкасблар иштирокисиз ўтказилади.

CNN Оқ уй ходимларидан бирига таяниб хабар беришича, Трамп келаси ҳафта Путин билан учрашиш истагида бўлса-да, логистика қийинчиликларини ҳисобга олган ҳолда бундай муддатда учрашув ўтказиш қийин бўлиши мумкин.

Телекомпания манбаларига кўра, Трампнинг ёрдамчилари учрашувларни режалаштириш ва тайёрлашга аллақачон киришган.

«Президентнинг сафари ва икки етакчи билан муҳим учрашувига тайёргарлик кўриш одатда вақт талаб қилса-да, расмийлар Трамп ўз жамоасини тезкор ҳаракат қилишга чақирганини таъкидлади», – дейилади CNN хабарида.

CNN Оқ уйда учрашув келаси ҳафта ёки яқин икки ҳафта ичида бўлиб ўтиши мумкинлигини айтди. Учрашув жойи ҳали аниқ қилинмаган, бироқ бир неча вариант муҳокама қилинмоқда, дея хулоса қилади телекомпания.

Аввалроқ Туркия президенти Ражаб Тоййиб Эрдўған ўз мамлакатини АҚШ, Россия ва Украина етакчиларининг музокаралари учун майдон сифатида таклиф қилганди.

Трамп Путин билан охирги марта 2019 йилда Осакада бўлиб ўтган G20 саммитида учрашганди. Бундан бир йил олдин етакчилар Ҳелсинкида икки томонлама саммит ўтказган эди.